KHAWTHLIR

Mizoram leh Assam ramri inkarah buaina a awm avanga Mizorama bungraw phur rawn lut turte Lailapur-ah hun eng emaw chen dan a nih hnuah, October 23 aṭangin bungrua an rawn lut a; harsatna awm loin ṭha takin an rawn lut thei zel.Vairengte police checkgate-a duty-te chhinchhiah danin, October 18 aṭanga October 24 tlai dar 4 thleng khan Assam aṭangin lirthei 1,356 a rawn lut tawh. Tuialhthei phur tura Mizoram aṭanga kalte pawhin harsatna tâwk loin an rawn lêt leh thei a ni.

October 24, Inrinni khan KṬP, College Veng Branch-in thisen pek rûnpui an huaihawt a, Aizawl Civil Hospital (ACH) tan thisen unit 56 an pe. Vaivakawn unit ṬKP pawhin ACH blood bank tan thisen unit 12 an pe a, petute mipa 10 leh hmeichhia pahnih an ni.

Serchhip Ṭhalai Pawl (SṬP) chuan Inrinni zing khan Serchhip Bazar leh a chhehvelah Covid-19 laka mipui an him theih nan hmai tuamna (mask) an sem. SṬP hian hmai tuamna leina nei lo leh bazar vela kal hmai tuamna vuah lote chu a thláwna pek zel an tum tih an sawi.

46 Assam Rifles chuan October 24, Inrinni khan New Vaikhawtlang khuaah Covid-19 chungchang mipui an zirtir a; Covid-19 hripuiin harsatna a thlen theihte leh inven dante mipui an hrilhfiah a ni.

State Referral Hospital (SRH)-ah nimin khan Covid-19 vei mi pakhat dah luh a ni a, ani nen hian hripui vei mi 53 enkawl mek niin, an zinga pathum chu ICU-ah enkawl an ni. SRH-ZMC Bulletin tarlan danin, ICU-a enkawl mi pathum zinga pahnih chu ventilator hmantir mek an ni a, pakhat dang pawh oxygen pek a ni. Isolation ward-a awm mi 50 zingah ngaihtuahawm an awm lo.