Staff nurse atana MPSC-in a lakte Mizoram sorkarin a hnâwl

Chief minister Lal Thanhawla chuan, Mizoram Public Service Commission (MPSC)-in Mizoram sorkara staff nurse hna thawk tura mi 25 a lak (rawt)-te chu Mizoram sorkarin a hnâwl tih nimin khan Congress Bhavan-ah a puang.

Nimina Congress Bhavan-a inkhawmah MPCC president leh CM Lal Thanhawla chuan, staff nurse tur mi 25 lakna atana interview-naah MPSC member pathum zinga pakhat chauh a ṭhu ve niin a sawi a, "Member pakhat chauh a awm avang leh sawiselna a tam avangin kan hotute'n, September 21, 2016-a Cabinet meeting chuan pawm lo ang, an ti a. MPSC recommendation hi hnâwl a ni," a ti.

Lal Thanhawla chuan, MPSC-in staff nurse 25 a lak chungchang chu sawiselna a tam avangin Cabinet meeting-ah chîk taka ngaihtuah a nih thu a sawi a; hemi rual hian, MPSC-in hna lakna a kalpuiah sorkar a inrawlh ngai loh thu leh MPSC chu a dik thei ang bera kal tura an duh thu a sawi bawk.

MPSC-in Mizoram sorkara a ngheta thawk tur staff nurse a laknaah hian kumin August 2 leh September 2 inkarah personal interview neih a ni a, September 2-ah result tihchhuah nghal a ni. MPSC chuan staff nurse turin mi 25 a rawt a, panel list-ah mi pakua an awm.

MPSC-in staff nurse tur a lak danah hian Mizo Zirlai pawl (MZP) chuan thil dik lo, chhungte induhsakna a awm nia ngai-in, MPSC chu dik taka la ṭha leh tura an phût bakah, Mizoram sorkar pawh MPSC recommnen-dation pawm lo turin an lo ngen tawh a ni.

MZP chuan, "Interview result a chhuak a, senior zawk tam tak la si loa MPSC chairman PC Lawmkunga monu, kum thum chauh private hospital-a la thawk leh a ṭhiannu kum nga chauh private hospital-a thawkte lak an ni hi ṭha kan ti lo," an ti a; MPSC Chairman chu MPSC-ah Manipur ze ṭha lo seng lut lo turin an chah.

MZP tarlan danin, staff nurse hi diltu mi 860 an awm a, MPSC-in dil dan dik loh vangin mi 62 an hnâwl a, mi dang 260 chu interview-ah an inlan lo. Mi 538-in interview an hmachhawn a, chuta ṭang chuan mi 25 lak an ni. Diltu zingah document felfai loh vanga hnâwl (reject) tawh mi paruk chu interview tura koh leh an ni a, chungte chu September 2, 2016-ah interview-tir niin, an zinga pali chu an tling zui a ni.

Hetih lai hian, PC Lawmkunga chuan, September 15, 2016 khan media-te zawhna chhángin, MPSC-in staff nurse tur a lak danah dik lo a awm lo niin a sawi. MZP-te'n thil hre chiang loin thu an chhuah nia sawiin, a monu leh a monu ṭhiannu an duhsak bik loh thu leh a monu interview ni-ah interview board-ah a ṭhu ve lo niin a sawi bawk.

MZP hruaitute'n MPSC Chairman monu nia an sawi chu K Lalengkimi niin, ranking-ah 19-na a ni a; an monu ṭhiannu nia an sawi chu PC Vanlalrinnungi niin, ranking-ah 17-na a ni.