Rangkachak suam thubuaiah mi 5 man nawn

December 14, 2015 zana rangkachak kg. 50, cheng vbc. 14.5 vel hû vel tawlhrûk phurtu motor suam thubuai kal zelah nimin khan Mizoram police-a Special Investigation Team (SIT) chuan mi panga man nawn leh an ni a, thubuai dang siamsak an ni.

Thu dawn danin, rang-kachak suam thubuaia a hmaa an lo man tawh tho zinga mi pangate chu SIT-in nimin khan an ko a, an lo man nghal a ni. Mi dang pakhat, Bulaki Chand Baid erawh chu magistrate phalnaa a zin mek avangin man a ni lo.

Nimina mante chu - 39 Assam Rifles comman-dant Maj. Jasjit Singh (42) Kulbir Singh, Chandigarh (present address - Tlangnuam, Ai-zawl); Lalmuanawma Mathipi (40) s/o M Mathaa, Zonuam, Aizawl; Kalyan Chandra Roy (46) s/o Bali Chandra Roy (L), 39 Assam Rifles; Sandite Madhu (29) s/o Reveen Chetty, 39 Assam Rifles leh, L John Singh (32) s/o L Maniyaima Singh (L), 39 Assam Rifles-te an ni.

Mi pangate hi Decem-ber 14, 2015 zana rang-ka-chak tam tham tak tawlhrûk suamnaah inhnam-hnawiha puh an ni a; nimina an man chhan hi chu Zampuimanga thlan lung bula insuamna vang ni loin, chumi kaih-hnawih thoa Bung Bangla lama rangkachak suam tura kal an nih vang a ni.

An vai hian SIT chuan a hma pawhin an lo man tawh a, bail-a chhuak mek an ni hlawm. Nimina man an nih leh hnuah, nimin chawhnu vêk khan bail-in an chhuak leh nghal nia thu dawn a ni bawk.