Lungleia ukilte'n affidavit siam an tum rih lo

Mizoram BAR Association (MBA) sub-headquarters, Lunglei chuan thuchhuah siamin, Lunglei Zohnuai mipuite'n Lunglei District Court leh magistrate quarters an suasam duh loh lantir nan affidavit, legal opinion, document-te leh ukilte inrawlhna chi hrang hrangah an inrawlh rih dawn lo tih an puang.

Nimina Lunglei MBA-te thuchhuah chuan, September 22, 2016-a Lunglei Zohnuai mipuiin Lunglei District Court building an khawih leh judicial officer quarters an suasam chu an dem thu an tarlang a, "He thil thleng hi MBA sub-hqrs, Lunglei chuan kan duh loh em avangin thu leh awm hma chu affidavit, legal opinion leh document hrang hrang bakah, advocate inrawlhna chi reng reng kan siam dawn lo a, mipuite hriatthiamna kan ngen a ni," an ti.

MBA chuan, Zohnuai mipui chêt dan chu pawi an tih thu sawiin, "District Court building an suasam hi kan dem tak zet a, judicial officer quaters suasam a ni leh zel phei chu thil thleng duhawm lo tàwp niin kan hria. Magistrate nupui fanaute mangang thlabára an awm hi kan lainat tak zet a ni," an ti.

India chu democracy ram a nih angin mi tu pawh dan hnuaiah an awm tih sawiin, Lunglei MBA chuan, "Mi ṭhenkhatin rorelna kan kuta kan lek ve mai ṭhin hi a dik loin democracy nihphung kalh tlat a ni," an ti a; thuneitute kuta pawi khawihtu a awm hnu pawha tharum thawh khawpa ûm zui a ni chu vanduaithlak an tih thu an sawi.

Lunglei MBA-te hian Zohnuai mipuite chu sorkar building leh quarters an tihchhiatna man chawi turin an phût a; pawi khawihtute chu dan anga hrem ngei se an duh thu an tarlang.

MBA chuan, Court beih a nih vanga High Court-in Lungleia judge leh magistrate-te a hnûk kîr vek chu Lunglei district mipuite'n an tuar hle dawn nia sawiin, "Tuna kan judge leh magistrate sawn chhuah tâkte hi High Court hian rawn dah kîr leh thuai se kan duh tak zet a ni," an ti.