Court beih leh magistrate qtrs. suasam A Mizo lo a, a Kristian lo - CM Hawla

Chief minister Lal Than­hawla chuan, September 22, 2016-a Lungleia Zohnuai mipuite'n Court leh magistrate quarters an bei chu pawi a tih thu leh rapthlak a tih thu a sawi a, "A pawi tak zet a, Mizorama la thleng ngai lo a ni. A Mizo lo a, a Kristian lo," a ti.

MPCC president ni bawk Lal Thanhawla hian nimin khan Congress Bha­van-a inkhawmah thu sawiin, Zohnuai mipui­te'n Court leh magistrate quarters an beih chungchang a sawi a; "Pisa lo khawih pawh ni se, chenna in leh zel khati taka an sawisa kha a pawi hle a, a malsawm pawh ka ring lo," tiin, lung-in táng hmel hmuh duh vanga mipuite chet dan chu a dem thu a sawi.

Lal Thanhawla chuan, Court leh magistrate quar­ters suasam a nih danah High Court pawh a thinrim hle a ni tih a hriat theih thu sawiin, "Hmun danga an tih zen zen ngai loh angin, a thawktute pawh an la chhuak vek a, engtikah nge Lungleiah thubuai an rem leh theih dawn tih kan hre lo; keini sorkar thuneihna a nih loh avangin kan hre phâk lo," a ti.

Chief Minister chuan, thinrim lantir danah mipuite'n zir tur tam tak an neih thu sawiin, "Thinrim kan lantir dan hi a Kristian tur a ni a, páwng sapatâl tur a ni lo," a ti a; "Vai hoin an tih ang kan duh loh ṭhin kan rama kan la ta zel mai hi a pawi tak zet a ni," a ti bawk.

Home Minister R Lal­zirliana pawhin September 22, 2016-a Lunglei District Court leh magistrate quar­ters suasamtute chu chhui zui an ni dawn tih a sawi.

R Lalzirliana hian nimina Mamit District Jail a hawnnaah thu sawiin, "Tun hnaia Lungleia thil thleng chungchangah thil dik lo titu chu chhuizui an ni dawn a, dan loa thil ti leh dan bawhchhiate chu sorkar chuan a hrem ṭhin. Dan loa thil ti kan huat viau laiin, buaina sang zawk chawk chhuak zawnga kan chet hi dan kalh tlat a ni," a ti.