KHAWTHLIR

Thisen pe

Lungsen Bial ṬKP-te chuan nimin khan Lungsen BCM Kohhran hall-ah blood donation camp an huaihawt a, mipa 41 leh hmeichhia 17-te'n Lunglei Civil Hospital tan thisen 58 an pe.

Heroin man

Mizoram police-te chuan nimin chawhnu dar 2 khan heroine hawng khat leh a neitua puh Lalruatkima (35) s/o Lalhmingthanga, Lungphunlian, Mamit district, tuna Dinthar, Aizawla khawsa mek nia insawi an man. Excise & Narcotics department-a Anti-Narcotics Squad-te chuan nimin chhun dar 11:50 khan Rangvamualah heroin gram 16 (hawng khat) leh a neitua puh Biaksanthawnga (33) s/o Tawkthanga, Tongphila, Myanmar, tuna Rangvamual Mel 3-a khawsa mek nia inchhál an man bawk.

Eng awm dawn lo

P&E department chuan vawiin hian Zuangtuia 132 KV Sub-Station aṭanga Aizawl Power House-a 33KV Indoor Sub-Station-a kawlphetha pekna hruipui an thlak chhunzawm leh dawn. Hei vang hian zing dar 6 aṭanga chhun dar 11 thleng kawlphetha pek theih a ni dawn lo a; Electric Veng, Chhinga Veng, Dawrpui, Zarkawt, Tuikual South veng ṭhenkhat, Treasury Square, Chanmari, Chaltlang, Laipuitlang leh Ramhlun PWD Mualahte power an hmu lo ang.

Siaha YLA Day

Young Lai Association (YLA) sub-headquarters, Siaha chuan nimin khan Siaha-a MYA Multipurpose Hall-ah an din champha vawi 42-na an lawm a, minister of state C Ngunlianchunga'n a hmanpui. He hunah hian hnam lâm chi hrang hrang entir a nih bakah, zaite ngaihthlak a ni.

Ram leisak

Parliamentary secretary Hmingdailova Khiangte chuan Kawnpui VC-I Bazar zauhna turin MLA fund hmangin LAMPS Society ram Rs. 10,00,000-in a lei a, ram neitu nihna lehkha chu kawnpui VC-I hnenah a hlan nghal.