AYUSH Hospital-ah a thlawn vekin damlo enkawl

AYUSH Hospital, Then-zawla mi chu nimin khan MJA member-te'n an tlawh a, an hnathawh dante an enfiah. Damdawi-inah hian a thlawnin damlo en an ni a, damdawi pawh a thlawn veka pek an ni.

MJA member-te lo dawng-sawngtu Health department-a deputy director (AYUSH) Dr C Lallunghnema chuan, AYUSH lama Mizoram-in hma a sawnna tura an hmalaknaah harsatna tam tak an tawh thu a sawi a, "AYUSH dah hniam tumna karah theihtawp kan chhuah a, thil tih a harsa hle. Scheme hrang hrang hâi chhuak turin
ṭan kan la a, tun dinhmun hi kan thleng thei a ni," a ti.

Dr C Lallunghnema chuan, AYUSH Hospital din a nih theihna atan chief minister Lal Thanhawla leh Lok Sabha MP CL Ruala ten theihtawp an chhuah tih sawiin, "Sorkar mai bakah Thenzawl mipuite pawh an phûr a, min nawr kal zawk a ni," a ti a; damdawi-in chu a theih ang anga tihchangtlun zel tum a nih thu a sawi.

AYUSH Hospital panna kawng hi a la ṭha lo hle a, tui duh anga an hmuh theih loh bakah, thawktute chenna tur pawh a la awm lo. Hemi chungchangah hian Dr C Lallunghnema chuan, "Mamawh hrang hrangte hi tihpuitlin a nih theih nan sorkar laipuiah dilna thawn a ni a, kan hlawhtlin ngei ka beisei. Tui lakna atan cheng nuai 57 hmuh theih beisei a ni," a ti.

AYUSH Hospital hi hawn la ni lo mah se, August 1, 2016 aṭangin inentirna hawn ṭan a ni a, October 2016-ah hawn tum a ni. August 2016 chhungin mi 2,506 an inentir a, chu'ng zinga paruk chu admit an ni.

Damdawi-ina thawktute sawi danin, inentir tura kalte chu OPD card man chawitir an nih bak chu a thlawn veka enkawl an ni a, test hrang hrang pawh thlawn veka tih niin, damdawi pawh an neih ang chu a thlawnin an pe. Test hrang hrang man hi official-a hawn a nih hnuah a thlawna tih a nih dawn leh dawn loh erawh chu sorkar thu a ni dawn a, damdawi erawh chu a thlawna pek zel a ni ang.

Damdawi-inah hian khum 55 awmin, department pathum - Medicine, Surgery leh Gynae-cology kalpui mek a ni. Sur-gery-ah surgeon an la awm loh avangin minor operation chauh tih theih a ni a, official-a hawn hunah surgeon lak tum niin, surgeon an awm chuan major operation ti turin khawl mamawh ang an nei vek tawh a ni.

Damdawi-inah hian thawktu doctor pasarih, account officer pakhat, staff nurse 12, laboratory technician pahnih, ANM pali leh 4th. grade 22 an awm mek.