Aizawlah cancer chungchang zirho a ni
Mizoram Population Based Cancer Registry chuan nimin khan IPR Con-ference Hall-ah Mizorama cancer natna vei leh thihpui chhan zirhona an buatsaih a; thuthar thehdarhtu te, kohhran hrang hrang leh YMA aiawhte leh sawm bikte an tel.
Hospital & Medical Education director Dr K Lalbiakzuala chuan, cancer natna Mizote'n thihpui ngei ngei tur anga an ngaihna chu thil hriat chian tâwk loh vang a nih thu sawiin, "Hmuhchhuah hma a pawimawh a, cancer hi natna tam tak awm khawm a ni a. Mizote'n kan vei nasat chhan ber pakhat chu kan ni tin nun dan phung, ei leh in leh zûk leh hmuam tih nasat vang a ni. Cancer natna 70% chu ni tin nun dan phung uluk loh vang leh zûk leh hmuam leh ei leh in vang a ni," a ti.
Non-Communicable Disease-a state nodal officer Dr Eric Zomawia chuan, Mizoram Popu-lation Based Cancer Registry zir chiannaa a lan danin, Mizoramah kum thum chhungin mi 4,656-in cancer an vei a, chungte chu mipa 2,567 leh hmeichhia 2,089 an nih thu sawiin, "Kum tin cancer vei thar mi 1,552 awm ziah ang kan ni," a ti. Kum thum chhung veka cancer vanga thi zat chu mi 2,711 an ni a, mipa 1,346 leh hmeichhia 830 an nih thu leh kum khatah mi 711 thi zel agn a nih thu a sawi.
Dr Eric Zomawia sawi danin, Mizorama cancer tam ber chu pumpui cancer an ni a, mipa leh hmeichhiaah pumpui cancer vei mi 710 an awm. Chuap cancer 688 leh chaw dáwt cancer mi 603 an awm bawk.
Dr Eric Zomawia chuan, cancer vei chhan tam ber nia lang chu zûk leh hmuam tih nasat vang te, thil rêp ei tam vang te, thil uih/rimna leh mawm ei nasat vangte a nih thu a sawi a, "Hetiang lamah hian mipuite kan ṭhanharha kan ni tin nunphung kan thlak a hun tawh hle a ni," a ti.
Dr Jeremy L Pautu, medical encologist chuan cancer vei mekte damdawia enkawl dan leh an natna vanga rilru hrehawm loa hahdam zawka an awm theih dan tur a sawi a; cancer veite chu an harsatna tawh chhâwk zângkhai a nih theihna turin an rilru tihhahdamsak leh, an chhungte thlenga rilru hahdama an awmna tura kalpui a ngaih thu a sawi. Chutiang atan chuan Zemabawka Mizoram State Cancer Institute-ah Palliative Care Unit kalpui mek niin, mi 350 velin treatment an la mek a ni.