CM-in free wifi a ṭhat a ring lo

MPCC President Lal Thanhawla chuan nimin khan Congress Bhavan-ah thu sawiin, Aizawl Municipal Corpo-ration (AMC)-in Aizawl hmun lûn laia free wifi pek an tum chu a fuh ber loa a rin thu a sawi a, "Free wifi hi thil hlauhawm tak a ni a, khawpui liana chuan an fimkhur hle. Ram dang kárcheha awm kan ni a, pawi khawih duhte tan hmanraw ṭangkai a ni thei," a ti.

Lal Thanhawla chuan, BJP-te chu an hlauhawm nia sawiin, "BJP-te hi an hlauhawm hle tih kan hriat a ngai a, common civil code tih an tum a, Hindutva hi an tum ber pakhat a ni," a ti. BJP-te chu India hmarchhakah pawh bu an khuar nghet sâwt hle nia sawiin, Pathian ringtu nihna humhim a nih dawn chuan ringtu nihna anga ṭan tlan a ngaih thu a sawi.

Congress party chu kum 2018 inthlanah pawh an chak leh dawn nia sawiin, Hawla chuan, "Kan sorkar leh dawn tih hi puang darh zel ang u, kan sorkar dawn avangin," a ti a; an sorkar leh dawn tih chu thlarau mite hmuh dan a nih thu leh lawm luh tur an nei reng chu an sorkar leh turzia tichiangtu niin a sawi.

MPCC President chuan, MNF-te hmuiah lo chuan kudam ruak a awm lo nia sawiin, "Mipuiin kudam ruak an hre lo... Sorkar sawiselna tur an hre lo a, sawichhiatna tur erawh an hria. Sawiselna tur an hriat pawh mimal nunah a ni a, sorkarah sawisel tur an hre lo," a ti. Tun hnaia MNF-te kawngzawh chu Congress party-in an hlâwkpui zawk nia sawiin, "MNF-te hian Zoram dung leh vâng fang se, hma kan sâwn phah zawk ang," a ti bawk.

Mizoram Youth Commission chair-man T Sangkunga, MLA pawhin thu a sawi a, Mizo ṭhalaite ram chhungah mi 2,554 leh ram páwnah mi 2,859, an vaiin mi 6,413-te training an pe tawh a, chu'ng zinga mi 3,202 chuan Mizoram sorkar hmalakna avangin hna an hmuh tawh niin a sawi.