Tennis Court hluiah Lunglei PS sak duh lo

Lungleia tlawmngai pawl hrang hrang intélkhawm, All NGO's Coordination Committee chuan Lunglei Tennis Court hmun hluiah Lunglei Police Station sak an duh loh thu an puang a; Lunglei PS sa tura sorkarin kut a thlak chu a tawp thlenga dodal an tum thu an an sawi.

Lunglei Tennis Court hmun hluia Lunglei PS sak tum vang hian nimin chawhnu dar 1 khan Lungleia tlawmngai pawl leh political party hrang hrang aiawhte Cultural Heritage Centre-ah an kalkhawm a; All NGO's Coordination Committee secretary PC Hranghnuna'n a kaihruai.

Meeting-ah hian Chhimbial Chhantu, MZP, MSU, PRISM, Lunglei Truck Owners Association, Auto Rickshaw Owners Association, Pensioner Association, Taxi Owners Association, Lunglei District Village Council Association, LDCC, MNF leh MCF aiawhte an tel.

All NGO-te chuan, sorkarin police station chu a hmun ngai emaw, DC Indoor Stadium hmun hluiah emaw sak an duh thu an sawi a; Tennis Court hmun hlui chu vantlang tana hmun âwla dah an duh thu sawiin, sorkarin police station a sa lui zel a nih chuan a tawp thlenga dodal an tum thu an sawi a ni.

Lunglei Venglai khawtlang pawhin an veng chhunga Tennis Court hmun hluia Lunglei PS sak chu an duh lo nia sawiin, All NGO chuan, duh loh lantir nan nimin khan Venglai mipuite'n Tennis Court hmun hluiah sitting demonstration an neiin an sawi. Punkhawmnaah hian Venglai mipuite chuan Lunglei PS sak an duh lohna thuziakte an tár a, an au rual nghal niin an sawi bawk.