HM Zira'n Mamit District Jail a hawng

Home minister R Lalzirliana chuan nimin khan Sabual khaw hlui, Hmunhlui tlanga Mamit District Jail siam thar a hawng.

Zu zawrh chungchang sawiin, R Lalzirliana chuan, "Hei hi zu tel loa awm thei lote tana zu chhia an in loh zawk nana sor-karin a ruahman a ni. Hei hian zu ruih emaw, ruih anga buaina siam phal a ni lo a, a bawhchhiatete chu vantlang hmun tifaia hrem ṭhin an ni a, thil zah-thlak a nih avangin tih nawn an chak tawh lo," a ti a; zu ruih vanga nupui fanau tithlabár zawnga awmte chu an in chhungah ngei luhchilhin police-te'n an man theih thu a sawi.

Home Minister chuan, Mamit District Jail hawn a ni ta chu Mamit district tana hmasawnna ropui tak a nia sawiin, "Jail hi misual hremna hmun ringawt ni loin, nunphung pangngai an zawh leh theihna tura inthununna hmun a ni a. Nun thar neia he hmun an chhuahsan hi sorkar chuan a duh ber a nih avangin, an tàn chhungin kut themthiamna chi hrang hrangte zirtir an ni ṭhin," a ti.

Khualzahawm, bialtu MLA John Rotluangliana pawhin thu sawiin, "Mamit district-ah jail kan neih loh avangin Mamit District Court-in thiam loh a chantirte Aizawl lamah indah chhoh ngai ṭhin a, chu'ng harsatna sukiang tur chuan Mamit district chhunga thunun ngai misualte chu awlsam takin tàninah an dah thei tawh dawn a ni," a ti.

Inspector General of Prisons Zoramthangi Hauhnar-in report a pek danin, Mamit District Jail atan hian kum 1999-ah Sabual khawtlangin hmun an pe a, North East Policy Modernisation Scheme 2002-2007 aṭanga sum dawn nuai 294 leh 13th. Fianance Commission 2011-2015 grant nuai 552 sênga sak a ni.

Jail thar hi mi 114, mipa 70 leh hmeichhia 44 tàn theihna a ni a; Jail hung chhungah in pakua leh hung páwn lamah quarters 15 a awm. Jail Superintendent hoin thawktu mi 34 leh armed security guards (MRHG) mi 24-in an awm chilh dawn a ni.

Mamit District Jail hawnna inkhawm Home additional secretary Lal-biakzama'n a kaihruai a; Prisons DIG K Lallawm-thanga pawhin thu a sawi.