Lunglei District Court beih chungchang MNF-in President leh PM-ah thlen tum

MNF president Zoramthanga chuan, Lungleia District Court building leh magistrate quarters khawih a ni chu dan leh thupek kenkawh kawnga sorkar hlawhchhamzia tichiangtu a nih thu sawiin, thil thleng chungchang hi India President leh Prime Minister hnenah ziaka an thlen dawn thu press mite a hrilh.

Zoramthanga hian nimin khan Aizawl Press Club-ah thuthar thehdarhtute kâwmin, Lunglei Court-a thil thleng chu dan leh thupek kenkawh kawnga sorkar hlawhchhamzia tilangtu a ni tih chu MNF-in an puhna ringawt ni loin, Gauhati High Court Chief Justice pawhin ziaka chief minister Lal Thanhawla a hriattir a nih thu a sawi.

Gauhati High Court Chief Justice lehkha-ah chuan, Lunglei Court beih a ni chu High Court-in a ngaih thutakzia te, law enforce-ment a hlawhchhamzia te, Mizoramah Judiciary-in hun thim tak a tawh thute ziah a ni tih sawiin, Zorama chuan, "A serious em em a, democracy-ah chuan lungphûm (pillar) pathum - Legislature, Executive leh Judiciary a awm a, pillar pathum zinga pakhat, Judiciary hi a tlusawp a ni," a ti.

MNF President chuan, Lunglei District Court beih leh dan leh thupek kenkawh kawnga sorkar dinhmunte chu India President leh Prime Minister hnenah ziakin a thlen dawn a, a copy chu Mizoram Governor pawh an pe dawn tih sawiin, engtin nge sorkar laipuiin a tih dawn, tiin an zuk zâwt dawn niin a sawi.

Thil thleng chu zu rûi mi ṭhenkhat, thunun theih lohte thil tih anga sawi a ni tih sawiin Zoramthanga chuan, chuti a nih chuan zu zawrh nghawng zel a nih thu a sawi a, "Zu zawrh vangin zu rûi an tam zual a, zu zawrh ṭhat lohzia entirtu a ni. Sorkarin zu a zawrh pawizia a lang chhuak mek zel," a ti.

Lunglei Court-a thil thleng chu kum 1987 vela thleng chu ni se, sorkar laipuiin President's Rule-ah Mizoram a dah ngei a rin thu sawiin, Zorama chuan, kum 1988-ah pawh MNF MLA zingah chhuak an awm a, House-ah sorkar bûk miah loin President's Rule-ah min dah a ni," a ti a; chutih laia chief minister Laldenga'n President's Rule-a dah chhan a zawhin, a chhan chu an la hriattir tur thuin an chháng a, mahse, tun thlengin President's Rule-a dah chhan an la hrilh ta lo niin a sawi.

Zawhna chhangin Zoramthanga chuan, ram rorelna President's Rule-a kaltir an duh loh thu a sawi a, "President's Rule-a rorelna a awm hi kan duh lo. Democracy hi tluang takin kan se kan duh a, mahse, democracy pillar zinga pakhat a tlu a; loh theih lohna, chhan hrang hrang vang erawh chuan a awm thei. Kan dinhmun rawn enfiah turin kan ngen ang. President's Rule-a dah leh dah loh chu an thu thu a ni," a ti.

MNF President chuan, Lungleia buaina thleng chu pawi an tih thu sawiin, "A kaikuang chhui dawn chuan a kual thui. Chumite vang a ni tia mi va kawh chu kan tih turah kan ngai lo," a ti a; mob rule chu
ṭha an tih ngai loh thu a sawi.

Staff nurse 25 lak tura MPSC rawtna sorkarin a hnawl chungchanga zawhna chhangin Zoramthanga chuan, "MPSC mualphona a nih rualin, sorkar pawh a mualpho tel a ni," a ti a; sorkarin tuna a tih dan anga ti mai loin, sawiho hmasa se, sawifel dan kawng zawnpui hmasa se ṭhaa a hriat thu a sawi.