YCA leh MCSU ten kawng an zawh

Mizoram Chakma Students' Union leh Young Chakma Association chuan nimin khan Chakma Autonomous District Council (CADC) sorkar laka kawng hrang hranga an lungawi lohna lantirin Chawngte-ah kawng an zawh.

Kawngzawhnaah hian CADC sorkar laka an lungawi loh chhan hrang hrang ziahna poster an ken bakah, sorkar rorel dana an lungawi loh thu an au chhuahpui a ni. CADC sorkar kalphung fuh loh vangin eirukna leh hlemhletna a hluar hle niin an sawi a, CADC sor-kar chu mahni thuneihna hmang sualah an puh.

MCSU leh YCA hruaitute chuan, DoNER aṭanga Lawngpuighat, Vaseitlang leh Kukurduleye inkalpawhna kawng siamna tur sum hmuh nuai 1037 chheprelh a nih thu te, Chawngte khaw chhung cheiṭhatna tura DoNER sum pek nuai 1789 hmanna leh, Chawngte khaw chhung inkalpawhna kawng thawm ṭhatna tur nuai 287 hmanna hmuh tur a awm loh thute an sawi.

CADC sorkar hotute chu an laina hnaite duhsak bikah puhin, an duhsak zawng mi eng emaw zat chu hna hrang hrangah dan loin an thun niin an sawi a; dan loa lakte bàn an nih theih nan kum 2015 aṭangin hma la tawh mah se, tun thlengin CADC sorkarin dan loin thawktu a la la reng niin an sawi bawk.

Kawngzawh hnuah pawl pahnihte chuan an thil phût pangate chu ziakin CADC sorkar hotute hnenah an thehlut.

NGO leh CADC inremna anga dân loa thawktu lakte bàn tura an inremna tihlawhtling tur te, personal assistant leh personal secretary-te dahnghehna order sût leh tur te, CADC-ah Independent Recruitment Board din an phût thu te, hna thawhna tur pek chhuah tawh hmanna chiang taka ziaka dah an phût thute an ziak a ni.