Social Welfare dept. ṭhen dan tur sawiho

Social Welfare department hotute chu nimin khan an minister PC Lalthanliana leh parliamentary secretary K Lalrinthanga te bhoin an ṭhukhawm a; thil pawimawh hrang hrang an rel zingah, Social Welfare department ṭhen chungchang a tel.

Meeting chuan, chief minister Lal Thanhawla ngaih pawimawh leh Cabinet meeting-ah pawh a thuphunga an lo pawm tawh, Social Welfare ṭhen a, department thar, Women and Child Welfare department din chungchang an ngaihtuah a; CM duh anga tihpuitlin ngei a nih theih nana hmalak dan turte an sawiho a ni.

Mizoram hmun ṭhenkhata lehkha a thlawn a zirna, EMRS, Lunglei leh Serchhipa kalpui mek thlirhoin, a ṭangkai em avang leh zirlai tan a ṭhat em avangin, hmun dangah pawh din a nih theih nan sorkar laipuiah dil belh ni se, an ti.

Tribal girls' hostel eng emaw zat hman ṭangkai mek leh sak zawh tawh hawn mai theih pathum, Thenzawl, Kolasib leh Mualpuia mite hman ṭangkai thuai dan tur an sawiho a; naupang kum 5 hnuai lam tana Aadhaar card siam a nih tur thu leh Social Welfare chu nodal department a nih anga hmalak dan turte an sawiho bawk.