Siaha-ah Black Day an hmang

Mara Chano Py (MChP)-te chuan September 7, 2016-a Chhuarlung khuaa hmeichhe pahnih - N Sidei (70) leh Z Elizabeth (32)-te thah an duh lohzia leh an tawrhpuizia lantir nan nimin khan Siaha Bazar traffic point-ah Black Day an hmang.

Black Day hmanna hi MChP president P Chaki-i'n a kaihruai a, Black Day hman chhante a sawi. P Chaki chuan, K Vanlalpianga’n N Sidei leh Z Elizabeth te ei tur dapa hna an thawhna hmuna a that chu an dem thu sawiin, chutiang thil rapthlak tak chu a thlen nawn tawh loh an duh thu a sawi a; K Vanlalpianga a phu tawk hremna pek ngei an phût thu a sawi bawk.

Black Day hmannaah hian resolution an pass a, “Kan hmeichhiatpui N Sidei leh Z Elizabeth, hmeichhe pawisawilo leh áwm ném zawkte chunga tualthihna rapthlak tak thleng hi rilru leh thinlung takin kan tawrhpui a, tun hnuah hetianga hmeichhiate laka tualthahna rapthlak tak a thlen tawh loh nan tualthattu K Vanlalpianga hi a na thei ang berin hrem ni rawh se,” an ti.

Black Day-ah hian Siaha district-a hmeichhe pawl pathum, MChP, MHIP leh LWA member-te bakah, tlawmngai pawl dangte aiawh an tel. Phúrâ khua leh Tuipang khuaahte Black Day hman a ni bawk.