MCON-a nurse zir chhuak thlahna leh lut thar turte lawmna buatsaih

Mizoram College of Nursing (MCON), Falkawn chuan nimin khan nurse zir chhuakte thlahna leh zirlai lut thar turte lawmna inkhawm, 29th. Graduation & Lamp Lighting Ceremony 2016 an buatsaih a, chief minister Lal Thanhawla'n a hmanpui.

Chief Minister chuan, nurse hna chu hna ropui berte zinga a mi a nih thu sawiin, "Ringtu nihna nen pawha inhmeh tak, tîsâ bakah thlarau damna rawngbawlna hna a ni. Thil ṭha kan tihteah hian thinglung takin hmangaihna leh duhsakna a tel em tihte hi kan chhût fo a pawimawh a, hei hi a bik takin damlote enkawl ṭhin nurse-te nunah a pawimawh lehzual," a ti.

Damdawi-in hmingṭhatna leh hmingthanna chu nurse-te'n damlo an enkawl danah thui tak a innghah thu sawiin Lal Thanhawla chuan, "Nurse hna a zahawmzia leh a thianghlimziate hriat reng a pawimawh. Export quality zirna kan neih dawn chuan kan zirlai piah bakah ṭawng, a bik takin Hindi hi kan thiam a ṭul," a ti a; nurse zir chhuak leh zir turte chu ṭawng thiam tam tum turin a chah.

CM Hawla chuan, Mizoram
ṭhalaite tan Mizoramah hna a vân tawh avangin India ram chhung leh ram páwn thlenga thawk turin an rilru leh an ngaihtuahnate buatsaih a tul thu a sawi a, "Hna thawk tur kan inthawn chhuah tam poh leh kan ram hi a changkang ang a, kan hnam a zahawmin a ropui zel dawn a ni," a ti.

Kum 1980 khan Aizawl Civil Hospital-ah Nursing School din a ni a, chumi hnuah college-ah hlankai niin, Mizoram College of Nursing tih a ni. Mi in luaha hun eng emaw chen an awm hnuah, kum 2013-ah Falkawna an building tharah an insuan a ni.

Tun dinhmunah MCON-ah hian zirlai 200 len theihna hostel sak zawh ṭêp tawh a ni a; zirlai 120 leh a ngheta thawk teaching staff principal tiamin mi 22, non-teaching staff mi 29 leh guest lecturer pakua an awm mek a ni.