Lunglei buaina:Lunglei DC suspend turin ti Sorkarin Magisterial Inquiry a din

Chief minister Lal Thanhawla hoin nimin zing khan CMO conference hall-ah Lunglei District Court beih leh magistrate quarters suasam chungchangah emergency meeting neih a ni a; Lunglei DC Abhijit Vijay Chaudhari suspend nghal tura sorkar laipuia thlen an rêl a, Magisterial Inquiry an din nghal.

Meeting-a an rel dan chuan, Lunglei DC suspend nghal tur hian Home Ministry (Cadre Controlling Authority an nih angin) thlen a ni dawn. He thil thleng chhui tur hian Aizawl DC Kanan Gopinathan chu mawhphurhna pek a ni a, a report chu working day ni sarih chhunga thehlut tura tih a ni.

Meeting chuan, Lunglei District Court leh judicial quarters-te venhimna dinhmun enchian leh a ṭul dan anga venhimna tihchak a rêl a; Lungleia judical officer pathum leh Lawngtlai judicial officer pakhat Lungleia Court nei ṭhin chu personal security officer (PSO) pek tura thutlukna siam a ni.

Court building leh quarters chhiate chu PWD-in a thawmṭhat hna kalpui nghal tura tih a ni a; buaina chhuak vanga mante chung-thu chu khauh taka rêl a nih theih nan a ṭul anga dan leh thupek kengkawhtute'n hma la se, tiin an rel bawk.

Meeting-ah hian Home minister R Lal-zirliana, chief secretary Lalmalsawma, Home secretary Renu Sharma, DGP Thianghlima Pachuau, PS to Chief Minister Lalram Thanga, Law & Judicial secretary Marli Vankung leh Home additional secretary Lalbiakzama te an tel.

Lungleia buaina chhuak kaihhnawihah hian police-te chuan mi 30 an man tawh a, buaina chhuah nía an man mi 17-te tih loh chu, Lungleiah magistrate an awm tawh loh avangin an chungchang ngaihtuah turin Aizawlah thawn zel a ni.

Hetihlai hian, Lunglei District MJA bultumin Pathianni khan Lunglei Press Club-ah Lunglei YMA Sub-Hqrs., MHIP Sub-Hqrs., Chhimbial Chhantu, Mizo Upa Pawl, MZP, MSU leh Lunglei District Sport Committee hruaitute an ṭhukhawm a; District Court leh quarters khawih chungchang an sawiho.

Meeting chuan Lungleia magistrate-te la chhuak a, Aizawl District Court-a dah an ni leh Lawngtlaia CJM Laldinpuia, Lungleia Circuit Court nei ṭhin phalsak a ni loh vanga Lunglei mipuiin harsatna a tawh mek leh tawh zel tur thlirin, mi ṭhenkhat kuthlei zualte pawi khawihna thleng chu demawm hle mah se, pawi khawih ve lo mipuite'n harsatna kan tawh ve tho avangin magistrate sawn chhuahte dah kir turin Registrar General of Gauhati High Court hnenah leh Chief Minister of Mizoram hnenah ngenna siam ni se, an ti.

Mizoram BAR Association, Lunglei-in thil thleng pawi an tih thu leh an dem thu an chhuah chu âwm an tihpui thu an sawi a; affidavit, legal opinion leh documents hrang hrang leh advocate inrawlhna chi reng renga inrawlh an tum lo chu mipui mamawhna leh harsatna hriatthiampuia sût tura ngen an rêl bawk.