Gas tichingpentute na zawka hrem rél

Nimin khan CMO conference hall-ah chief minister Lal Thanhawla leh Food, Civil Supplies & Consumer Affairs minister John Rotluangliana te hoin sorkar hotute leh Central YMA hruaitute'n eirawngbawlna gas harsatna leh gas tichingpen ṭhinte laka na zawka hmalak dan tur an sawiho a; gas tichingpentute na zawka hrem tura hmalak an rêl.

Meeting-ah hian DGP Thianghlima Pachau, IGP Zorammawia, FCSCA secretary Dr Franklin Laltinkhuma leh officer dang te, Central YMA vice president Vanlalruata leh CYMA office bearer dang pathum an tel.

CYMA hruaitute chuan, CYMA-in eirawngbawlna gas tih-chingpen a tawp theih nan leh a tichingpentu laka hma an lak dan an sawi a; gas tichingpen ṭhinte lakah chak zawk leh zau zawka Police, Supply department leh CYMA-te inṭawiawm tawna ṭan lakho dan tur sawiho a ni.

Meeting chuan, gas tichingpen ṭhinte chu a na thei ang bera dan anga hrem a nih theih nan chak zawka hmalak ni se, an ti a; tihchingpennaa gas dealer inhnam-hnawih an awm chuan dealer an nihna titawp turin India Oil Cor-poration-ah thlen ni se, an ti.

Hnianghnâr zawka gas supply a awm thei nan sub-division tinah gas agent pakhat leh district headquarter tinah gas agent pahnih tal leh Aizawl khawpuiah tun aia agent tam zawk dah a nih theih nan IOC-ah thlen an rel a; gas company dangte Mizorama an luh theih dan tur zawng turin Supply department kutah an dah.

Eirawngbawlna gas tichingpentute lakah tun hma chuan police case chauh siamsak ṭhin a ni a, tun hnai aṭang khan pawi khawihtute chu police case bakah, Essential Commodities Act hnuaiah thubuai siamsak tawh an ni.

Tunlaia gas supply thlen ṭhat loh chhan ber chu, gas phurtu carrying contractor-te'n a phurhna man tender an chhan hniam lutuk vang a nih thu meeting-ah sawi lan a ni a; hemi chungchang hi IOC lamah hriattir a, chingfel vat tura ngen an rel bawk.