Lungleiah judge dah thuai turin ngen

MPC party office bearer-te an senior vice president Vanlalhlana hoa nimina an party pisaa ṭhukhawn chuan, tun hnaia Lungleia Court building leh quarters khawih vanga judge sawn chhuah takte chu an hmun ngaia dah let leh thuai turin thuneitute an ngen.

MPC chuan, "Lungleia thil thleng duhawm lo taka Lunglei Zohnuaia NGO leh kohhrante'n thuneitute hnenah thuphá cháwia ngaihdam an dilna hi âwm kan ti a, sorkar thuneitute pawhin an ngenna hi tihhlawhtlinsak ngei se kan duh," an ti.

Gauhati High Court-in Lung-leia judge a sawn chhuak vek chu âwm an tih rualin, Lunglei mipuite tan buaina leh harsatna thlen thei a nih avangin, an ngaihdam dilna hriatthiamsak a, an hmun ngaia dah leh ngei turin thuneitute an ngen a ni.

MPC party chuan, sorkarin MLPC Act hnuaiah khauh takin zu zawrh a ni dawn tih an sawi lai leh mi pakhatin thla khatah zu ûm ruk chiah an lei theih laia Cheural khuaah zu cheng nuai 8 chuang man man a ni chu MLPC Act hlawhchhamzia lannaa an ngaih thu an sawi a, "Dik tak leh fel taka dan leh thupek kengkawh tawh turin Mizoram sorkar kan ngen a ni," an ti.