Sorkar laipuiin Khampat Bûngpui Venghim turin Myanmar a ngen

27th September, 2016

External Affairs minister Sushma Swaraj chuan, nimin khan chief minister Lal Thanhawla hnenah lehkha thawnin, Khampat Bûng venhim a nih theihna atan a ṭul anga hma la tura Myanmar sorkar ngen a nih thu a tarlang a, India leh Myanmar ramri chu dan loa sumdawnna hmun atan a chang tur a nih loh thu a hrilh.

Chief Minister hian July 2016 khan External Affairs Minister hi a pisaah hmuin, Myanmar leh India-in inlaichinna ṭha zawk a awm theihna tur te, China inlak lênna laka invenna atan India sorkarin Myanmar-a a hmalakna tihchak a ngaih thu te, Myanmar rama Zo hnathlak leh Mizoram mipuite inkara inunauna chu ram pahnihte inṭhian ṭhatna atana a pawimawh thute leh, Khampat Bûng-pui humhalh a ṭul thute a thlen a ni.

Sushma Swaraj chuan a lehkhathawnah hian, "Myanmar sorkar hnenah lehkha thawnin, Khampat khaw dâia Khampat Bûngpui venhim a nih theihna atan a ṭul ang anga hma la tura ngen a ni. Hemi chungchang hi August 2016-a Foreign Office Consultation neih-ah pawh sawi chhuah a ni a, a ṭul angin kan bawhzui zel ang," a ti.

Myanmar rama India sorkarin hmasawnna hna thawk turin eng project pawh Myanmar sorkar-in min ngen a nih chuan thlawp a nih thu sawiin External Affairs Minister chuan, "Myanmar mipuite'n hmasawnna an hmuh theihna tur a nih chuan eng project pawh thawh kan inhuam," a ti a; August 2016-a Myanmar President hmuh a nih ṭum-
in ṭanpuina pek hun tur pawhsei a nih thu a tarlang.

Sushma Swaraj chuan, insumdawn tawnna ṭha taka kalpui turin infrastructure ṭha neih a pawimawh tih chu a pawmpui thu CM Hawla a hrilh a, "Km. 80-a thui Rih-Tiddim kawng Zo-khaw-thar rawn pawhtu siam ṭha turin hmalak a ni. Ram pahnihte'n inkal-pawhna ṭha zawk kan neih theihna atana rawtna hi kan lawm hle," a ti.

External Affairs Minister chuan, Chief Minister hnenah hian a mawhphurhna leh tih tur hrilhin, "India leh Myanmar border hi ṭhenawm ramte'n thil ṭha lo an siam chhuah, dan loa an tawlh-rukna hmunah a chang tur a ni lo," a ti a; dan loa thil tawlhruk chu venhimna lamah nghawng ṭha lo tak a neih theih tur thu a sawi.

Sushma Swaraj chuan, ram pahnihte inkal--pawhna kawngah dan fel tak siam turin CM Hawla a hrilh a, "Hei hian sumdawnna, tourism, hriselna leh zirna lam tihchangtlunte pawh a huam thei a ang. Hetiang hi kalpui a nih theihna atan inkalpawhna lamah pawh Myanmar sorkar sawipui mek a ni," a ti.