Speaker hlui Dr Kenneth-a'n ZNP a zawm
Mizoram People's Conference (MPC) party-a executive vice president leh speaker hlui Dr Kenneth Chawngliana chuan Zoram Nationalist Party a zawm a, nimin khan ZNP president Lalduhoma'n an party pisaah a lawm lut.
Dr.Kenneth Chawng-liana hi ZNP Political Affairs Committee thutlukna ang-in ZNP Vice President-ah dah nghal a ni.
Dr Kenneth Chawng-liana chuan ZNP a zawm chhan sawiin, “Kan ramah hian kum 30 chuang party hrang hrangin sorkarna an chang tawh a, ram tana an theih tâwk chu mipuite'n kan hre chiang tawh viau. Beisei tur awm chhun chu ZNP policy leh Pu Lal-duhoma hi a ni ta berin ka hria a, ṭawiawm turin ZNP ka zawm a ni,” a ti.
Dr Kenneth Chawng-liana hi politics-a a luh hmain Kolasib College leh Hrangbana College-te dintu niin, principal hmasa a ni a, politics-a a luh hnuah kum 1978-79 chhung leh 1979-84 chhung MLA niin, MLA term hnihnaah hian Assembly Speaker a ni.
ZNP president Lal-duhoma pawhin thu sawiin, inthlan dawnah lo vât peih lo, buh tuh peih lo, rei lo têa Chief Minister nih thut tum an awm ṭhin niin a sawi a, "MLA nih nghal mai tum, mipui nei mang si lo, party awm saa luh mai tum si lo, mahnia engmah ni tak tak bawk si lo, tute emaw ngaihtuahna la péng tur tâwk, tute emaw party tana ṭang-kai tur tâwk leka boruak siama thil tih chíng kan hmu ziah," a ti a; chutiang mite chu policy atana ṭha an tihte nen ZNP-in an pawm theih reng thu leh nihna ṭha an pek theih reng thu a sawi.
Lalduhoma chuan, tun hnaia Lungleia Court building leh Magistrate quarters khawih a nih chungchangah, pawi khawihtute an inchhir a, an khawngaih thlak letling hle niin a sawi a, "Mi tam tak pawi sawi ve lo hrût tel zawnga rorelna lekkawh a ni hi a dik loin kan hria. Thil ti dik lo chu dan hmaah danin an chungah ro a rel mai tur a ni. Thil ti dik lo tlemtê vanga mipui awm mai mai, tisual ve lo tam tak hrem tela an awm hi a
ṭha kan ti lo a, High Court pawh inngaihtuah ṭha turin kan duh a ni," a ti.
ZNP President chuan, tun hnaia MPSC-in staff nurse tura a lakte sorkarin a hnâwl chungchangah, "MPSC recommendation hi sorkarin a pawm ngei tura ngaih a nih laiin, thil dik tâwk lo a awm a ni ngei ang, an hnâwl ngam a, sorkar hi a huaisen hle," a ti a; MPSC a mualpho chu a pawi a tih thu leh, tun hnuah thil dik lo thleng tawh lo se an duh thu a sawi.
ZNP thuchhuah chuan, nimina MPC Executice Vice President an lawm luh rual hian, Aizawl veng hrang hrang-a MNF leh neutral voter eng emaw zat an party-ah an lawm lut niin a tarlang.