KHAWTHLIR

Garage neih tur

Mizoram sorkar chuan thuchhuah siamin, July 27, 2016-a Coordination Committee on Traffic Management ṭhukhawm­in rawtna a siam tawh angin, Aizawl Municipal Corporation(AMC) huam chhunga lirthei neitu zawng zawng chu October 1, 2016 aṭanga chhiara kum khat ral hma ngeiin an lirthei hûnna tur hmun/garage nei vek turin a hriattir.

Luiah tla hlum

VLR Hmangaihzuala (18) s/o Lalremruata (L), Chaltlang chu September 25, 2016 tlai dar 4 vel khan Muallungthu-Khumtung kâi Tuirial luiah chesualin, a tla hlum a, Pathianni zan dar 10:30 hma deuhah a tlâkna lí-ah hmuh a ni.

Pharmacists' Day

Mizoram State Pharmacy Council chuan, nimin kan IPR Conference Hall-ah Pharmacists' Day an hmang a, thupui chu 'Pharmacist: caring for you' tih a ni. 'Clinical pharmacy practice - A vision for Mizoram pharmacists' tih thupui an zirho.

Thisen pe

Zuangtui Bial KṬP chuan nimin khan blood donation camp an huaihawt a, Aizawl Civil Hospital tan mipa 31 leh hmeichhia pakhatte'n thisen unit 32 an pe.

NLUP sem

Sericulture department chuan nimin khan Saitual leh a chhehvelah NLUP ṭanpuina an sem a; chhungkaw 98 hnenah Rs. 38,245 ṭheuh leh chhungkaw 34 hnen-ah Rs. 49.160 ṭheuh sem a ni. Industries department pawhin nimin khan Aizawl North I leh II, Aizawl East I leh II-a chhungkaw 659 hnenah NLUP ṭanpuina an sem bawk.

MZU-ah workshop

Mizoram University-a Department of Mass Communication chuan nimin khan ni hnih awh tur 'Race, Space and the City' tih thupui zirhona an buatsaih ṭan a, resoure person chu Prof. Rozena Maart, Director, Centre for Critical Research on Race & Identity, University of Kwazulu-Natal, Durban, South Africa a ni.

Fimkhur turin mipui chah

Aizawl District Magistrate chuan thuchhuah siamin, tunlaiin Mizoram-a district hrang hrang, a bikin Champhai district-ah vawk natna Porcine Reproductive & Respiratory Syndrome (PRRS ) a léng mek tih a tarlang a; mi tinte fimkhur turin a chah. PRRS a len avang hian Aizawl DC chuan Cr.PC Section 144-in thuneihna a pek angin thupek a chhuah a; Myanmar, Manipur leh district dang aṭangin Aizawl district-ah vawk lak luh phal a ni lo. Aizawl district-a vawk vulh lai PRRS vanga thi chu hralh phal a ni lo a, phûm bo tur a ni. Thupek zâwm lote chu dan anga hrem tur an ni a; thupek hian a chhuah aṭanga thla hnih a huam ang.

JNV chungchang sawihona nei

Jawahar Navodaya Vidyalaya (JNV), Thingdawl inrelbawl dan leh hmasawn zel dan tur sawihoin nimin khan Vidyalaya Management Committee (VMC) chu Kolasib addl. DC R Lalremsanga hoin a pisa-ah an ṭhukhawm a, eirawngbawlna gas chungchanga harsatna tawh te, main gate - mess room leh mess room hostel inkar kawng siam dan turte leh khelmual siam dan turte sawiho a ni.