PRISM-in MLA-te vil tur din dawn

PRISM chuan nimin khan an pisaah MLA zawng zawngte hna thawh dan viltu tur, Shadow Cabin an din tur chungchang thehdarhtute kâwmin an hrilhfiah.

PRISM president Vanlalruata chuan, Shadow Cabin chu ram tak takin an ṭhat-pui nia sawiin, "Kum 2007 aṭang daih tawh khan kan opposition party-te hi Shadow Cabin din turin kan ngen fo tawh a, tun thlenga heti zawnga ke an pên duh loh avangin kan din ta tawp a ni," a ti.

Vanlalruata sawi danin, Shadow Cabin hi opposition party-te'n nei ṭhinin, an party chhunga ministry hlimthla an lo siam a, opposition leader emaw, an party hruaitu chu ministry hruaitu lu ber anga hna thawktin, minister leh nihna pawimawh dang chelhtu vil tur pawh an insiam vek a ni.

Sorkar policy, scheme leh hmalaknate chîk taka vilin an enpui a, sorkar thil tum leh thil tihte an hrechiang hle ṭhin a; sor-kar thil ṭha tih tur an phûrpui bakah, thil ṭha
lo an tih dawnin a tlai hmain siamṭhat
a nih theihna atan hma an la zel ṭhin.

PRISM President chuan, Shadow Cabin an dinah chuan minister-te chauh ni lo, MLA zawng zawng vil a nih dawn thu sawiin, "A huhoin an vil dawn a, MLA fund hman dan thlenga vil tur a nih avangin khua leh veng tinah hma latu tur kan mamawh," a ti.

Shadow Cabin chu member an neih sa hmang ringawta din tur a nih loh thu sawiin PRISM chuan, mahni khua leh venga sorkar hmalakna vil peih turte chu tel turin an sáwm a ni.