Aadhaar card siam chak thei rih lo

Aizawl DC Kannan Gopinathan chuan thuchhuah siamin, khua leh veng hrang hranga Aadhaar card siam hna thawk tura mi tirh chhuah tum chu khawlah harsatna a awm avangin tum ang leh duh anga chakin kalpui theih a ni rih lo tih a tarlang.

Aizawl DC tarlan danin, Aizawl district-ah Biometric Enrolment (Aadhaar thlalakna) tluang taka a kal laiin, phai lama Aadhaar card siamtu Unique Identification Authority of India (UIDAI) leh Registrar General of India (RGI) inkarah harsatna a awm avangin a taka hna thawktu ECIL-te thlalakna khawl ṭhenkhat (software) hman theih lohin a awm nual a; hei vang hian duh anga chakin Aadhaar card siam hna an kalpui thei lo a ni.

DC thuchhuah chuan, "Tuna khawl hman theih la awm chhunte hmangin thlalak chhunzawm zel a ni ang a. A hma aiin ni khata thlalak theih zat a tlem dawn avangin mipuite dawhthei leh zual turin kan ngen. Khawl ṭha leh thla latu tam zawk neih belh theih nan hmalak chhunzawm zel a ni," a ti.