Misual hmuh duh vanga punkhawm Police-in ṭha an tih loh thu an puang

Mizoram police chuan thuchhuah siamin, police-in thil sual titu an man tawh, hmuh tum ṭâlh vanga tharuma thawhna leh bungraw tihchhiat a ni fo chu thil ṭha lo tak a nih thu an tarlang.

Police thuchhuah chuan, misual hmuh tum ṭâlh avangin hnu chhuitute'n hna thawk thei lêk loin, mipui thinrim nen innawr a ngai ṭhin tih sawiin, "Hei hian thil sual titu dan anga hremna tur hna nasa takin a tiṭhuanawp ṭhin," a ti. Inhliam vanga dam chhunga piansualnate leh thihna hial a thlen theih thu te, sorkar bungraw chhia vangin sorkar sum tam tak ṭul lo taka sên a ngaih fo thu te, hetiang thil a thlenin tel ve mai maite pawhin criminal case awrhin, an hun kal zelah record ṭha lo tak neih phah theih thu leh, sorkar hna leh hna dang thawk thei loin an awm phah theih thute a tarlang.

Mipui pungkhawmin harsatna an siamin dan kenkawh a ṭul ṭhin thu sawiin Mizoram police-te chuan, "Hetianga mi sâhâwk pungkhawmte hnawh darh nan leh dan nan, a
ṭul ang zela chet a ngai ṭhin. Mizoram police chuan 'Kan hmu duh' tih vanga police hmun leh sorkar hmun reng reng luhkhung chíng lo turin mipui kan ngen a ni," an ti.