KHAWTHLIR
Thisen pe
Inrinni khan Aibawk Bial KṬP-te'n Aizawl Civil Hospital tan thisen unit 46 an pe a, a petute mipa 42 leh hmeichhia pali an ni a; Zoram Medicare Pharmacy-in World Pharmacist Day pualin unit riat an pe bawk. Ramhlun Vengthar Branch KṬP-in Synod Hospital tan unit 37 an pe a, a petute mipa 35 leh hmeichhia pahnih an ni. J Buana College, Lunglei-in Lunglei Civil Hospital tan unit 24 pein, a petute mipa 20 leh hmeichhia pali an ni.
Free clinic
Aizawla Electric Veng Branch YMA chuan an kum 50 tlin, golden jubilee lawm nan Inrinni khan West Lungdar-ah a thlawna inentirna an buatsaih. Free clinic hi West Lungdar YMA Hall-ah neih a ni a, doctor pangain mi 700 chuang an en a, a thlawnin damdawi an pe. West Lungdar khaw mite bakah, Chungtlang, Rulpuihlim, Lungphun, Kanghmun, Hreichuk leh Khawrihnim khaw mite an inentir a ni.
Khawlai thianfai
Saitual Higher Secondary School-a NSS volunteer-te chuan September 24-a National Service Scheme (NSS) Day pualin September 23 khan Saitual khawlai thianfaiin an hnatlang. Sikul naupang leh zirtirtute'n kawngpui dunga bawlhhlawhte an chhar khawm a, an sikul hung chhung an tifai bawk.
Missionary Day
Nimin Pathianni kha UPC din champha vawi 71-na a ni a, UPC (NEI) chuan khawvel hmun danga UPC-te rualin Missionary Day an hmang. UPC tualchhung kohhran hrang hrangte chuan ruai nen an hmang a, kohhran ṭhenkhat chuan September 23 zan aṭangin an hmang a; UPC (NEI) hmunpuia hruaitute'n hmun hrang hrangah an hmanpui a ni. United Pentecostal Church hi September 25, 1945-ah USA-ah din a ni a, India hmarchhakah chuan February 18, 1950-ah din a ni.
Politics sawiho
All Mizoram Women’s Federation chuan September 23, 2016 khan Mizo Hmeichhe Ṭangrual Hall, Khatlaah 'Heart to heart discussion on political empowerment for women in Mizoram’ tih an buatsaih a, Mizoram State Women Commission chairperson Vanlalawmpuii Chawngthu, MLA-in a hmanpui.