Court-ah Zohnuai-in ngaihdam an dil Magistrate chenna suasam an dem

Lunglei Zohnuai khawtlang chuan September 22, 2016-a an veng mipuiin Lunglei District Court leh magistrate quarters an khawih vangin Gauhati High Court Registrar General hnenah thupha an chawi a; ziakin thupha chawina lehkha an thawn.Thupha chawina lehkhaah hian Zohnuai Village Council, YMA, MHIP, MUP, Baptist Kohhran leh kohhran dang aiawhte'n hming an ziak a ni. Hetihlai hian Mizoram Judicial Service Association (MJSA) leh Chhinga Veng Local Council leh YMA chuan thu-chhuah siamin, Lunglei District Court beih a ni leh magistrate chenna suasam a ni chu an dem thu an tarlang.

Zohnuai khawtlang chuan, Zohnuai mi leh sa zu rûi leh misual ṭhenkhatte'n lunga Court building an tàwng leh judicial quarters an suasamte chu an duh loh thil a nih thu leh pawi an tih thu an sawi a, "Judicial quarters suasama ni phei hi chu kan hriatpui loh thil liau liau a ni. Hetiang tharum thawhna a thleng hi pawi kan ti tak zet a, ngaihdam kan ṭulna apiangah in mi ngaihdamna sang ber kan ngen a ni," an ti.

Pawi khawihtute police-in an mannaah sorkara thuneitute an thláwp tih sawiin, hmalak zelna turah theihtawp chhuahpui an inhuam thu an sawi a; quarters tihchhiat leh Court building darthlalang kehte chu an theih ang tâwka thawm ṭhat an inhuam thu an sawi bawk.

Zohnuai khawtlang chuan, Lungleia judicial officer-te sawn chhuah vek an ni chu pawi an tih thu sawiin, "Hei hi mipuite tana tawrhna thlen thei thil a nih avangin, khawngaih takin judicial officer-te hi an awmna ngaiah rawn dah leh ṭheuh turin kan ngen tak meuh che a ni," an ti.

MJSA chuan, "Lunglei District Court chu mipui zinga ṭhenkhatin lung leh hmanraw danga an beih chiam mai bakah magistrate chenna ina luta an bungruate tichhe vek a, an thawmhnawte hâl a, a fanaute thlabár taka siam an ni hi pawi kan tiin, a titute kan dem tak zet. Kan thawhpui magistrate leh nupui fanau bakah, staff leh chhungkaw thlabár taka tuartute hi kan lainat tak zet a ni," an ti a; hetiang thil thleng duhawm lo hi Kristian ramah thleng tawh lo se an duh thu an sawi.

Chhinga Veng LC leh YMA-te chuan thuchhuah inṭawm siamin, "Kan veng pa Lungleia magistrate Malsawmdawngzuala, khawtlang hruaitute leh YMA sub-hqrs. hruaitute'n nasa taka bán an phar pawh pawisa loa Zohnuai mipuiin a office leh quarters suasam a, a nupui leh fanaute thlenga thlabár taka an siam hi kan a dem tak zet a ni. Hetiang thil chin ṭha lo tak hi tun hnuah thleng tawh lo se kan duh a, pawi khawihtute hi man chhuaha an phû tâwk hremna pek ngei ni se kan ti," an ti.