Cheural khawtlangin zu Cheng nuai 8 hû an man

Cheural khawtlang ṭangrual, V/C, YLA leh LWA-te chuan September 24, 2016 zan dar 7 vel khan an khuaah zu Whisky báwm (case) 40, Rum báwm 22 leh beer báwm 9 an man. Zu an mante hi Siahaa an hralhna mana chhûtin, cheng nuai 8 chuang hû a ni.

Zu mante hi Lunglei aṭanga Siahaa phurh luh tur a ni a; maxicab MZ-04 9526 leh Bolero car MZ-01 L-2289 hmanga phurh a ni. Bolero hi Biakveli, Lunglei Rahsi Veng ta niin, maxicab hi Lalrotlinga, Lunglei College Veng ta a ni a; zu neitu nia insawi chu Fawmiangi, Siaha Tlangkawn a ni. Cheural khawtlang hruaitute chuan an zu mante hi an tichhe nghal vek a ni.