District Park hlamchhiahah sorkar puh

MNF sub-headquarters, Lunglei Vigilance Board-te chuan Inrinni khan Zobawk ram chhung, Tlawng lui hnára Lunglei District Park an enfiah a; District Park chu a ram tawh hle nia sawiin, "Kum 4/5 kal ta aṭanga ngaihthah leh hlam-chhiah a ni hi pawi kan ti tak zet a ni," an ti.

Lunglei MNF Vigilance Board chuan, kum 2009 aṭanga 2016 thlengin Lunglei District Park enkawl nan Rs. 8,00,000 hmuh a nih thu an sawi a; MNF sorkar laiin changtlung taka enkawl a ni a, a hman man pawh ṭhahnem tak hmuh a ni ṭhina sawiin, "Tun kum 2016-ah hian Rs. 5,200 chiah hman man hmuh a ni hi zahthlak kan ti tak zet," an ti. Lunglei District Park chu a rang thei ang bera chei ṭhaa tuai hnúm turin sorkar an phût a ni.

Lunglei MNF-te tarlan dan-in, Lunglei District Park chei nan kum 2008-09 ah cheng nuai 10 hmuh niin, cabin hlui tawh ṭhiatin hall thar sak a ni a; kum 2009-10 ah Rs. 5,00,000 hmuh niin, retaining wall pahnih, pavement pahnih, PCC flooring pakhat, step leh inaugural stone siam ṭhat a ni. Kum 2011-12 ah Rs. 3,00,000 hmuh niin, barbed wire fencing siam nan Rs. 2,39,700 leh chowkidar quarters thawm ṭhat nan Rs. 60,300 hman a ni a; Kum 2010-11, 2012-13, 2013-14, 2014-15 leh 2015-16 ahte sum hmuh a ni lo.

District Park

aṬanga sum hmuh

Kum Sum hmuh

1. 2008 Rs. 38,700

2. 2009 Rs. 17,800

3. 2010 Rs. 40,400

4. 2011 Rs. 33,900

5. 2012 Rs. 27,600

6. 2013 Rs. 19,600

7. 2014 Rs. 12,000

8. 2015 Rs. 10,300

9. 2016 Rs. 5,200