SADC sorkar thuneihna hmang sualah puh Naktukah Chawngte-ah kawngzawh dawn

Chakma Autonomous District Council (CADC) huam chhunga pawl hrang hrang hruai-tute tun hnaia Chawngte-a ṭhukhawm chuan, CADC sor-kar chu kawng hrang hranga a thuneihna hmang sualah an puh a; CADC sorkar laka lungawi lohna lantir nan September 27, Thawhlehni hian Chawngte-ah kawng zawh an tum.

Mizoram Chakma Students' Union, Central Young Chakma Association leh YCA branch hrang hrang bakah, zirna in hrang hrang aiawh zirlai pawl hruaitute ṭhukhawm chuan, CADC sorkarah eirûkna a hluar hle niin an sawi a; sorkar hotute chu an laina hnai leh chhung-khatte duhsak bikah puhin, dan loa hna ruak tam tham tak hnawhkhatah an puh a ni.

Pawl hrang hrangte chuan, kum 2016 chhungin CADC sorkar thuneituten an duhsak zawng mi 40-te hna hrang hrangah dan loin an thun niin an sawi a, "Dan loa lakte bân an nih theih nan July 15, 2016 khan CADC leh NGO-te'n inremna kan siam a, ni mah se la, thla khat chuang a ral hnuah pawh inremna hi CADC sorkar-in a tihlawhtling thei lo," an ti.

CADC sorkar chu hmasawnna hna thawhna tur sum tam tak chheprelh ṭhinah an puh bawk a; kum 2009-a order tihchhuah tawh DoNER aṭanga sum hmuh nuai 1152 hmanga Lawngpuighat aṭanga Kukurduleye panna kawng tur tun thleng laih a la nih loh thu te, Chawngte khaw chhung tihhmasawnna tur cheng nuai 1988 tihchingpen a nih thute an sawi a ni.