Manipur MZP-in khawmpui an hmang

MZP headquarter, Manipur chuan Inrinni khan Churachandpur, Manipur-ah 43rd Annual Conference cum Meritoriuos Award 2016 an hmang a; parliamentary secretary (School Education) Joseph Lalhimpuia'n a hmanpui.

Joseph Lalhimpuia chuan, chief minister Lal Thanhawla'n 'Political boundary-in min dang mah se, thisena kan inzawmnate leh kan inkungkaihna hi engmahin a dang lo a, tihchak deuh deuh a ṭul. Hnam dang hmuha kan mawi theih nan Zo hnahthlakte'n inpumkhatna ṭha zawk neih kan neih a ṭul. Zo hnah-thlakte chu hmun hrang hranga kan ram aiawha awm kan nih avangin sorkar chu a tih ve theih lam leh a tih ve turahte kan tlanchhe lo,' tih sawi tura a chah thu a sawi.

Churachandpur mipuite chu kawng hrang hranga an inpekna leh an tai-maknaah fakawm a tih sawiin, Joseph Lalhimpuia chuan, pi leh pute nuna bet tlawmngaihna, rinawmna leh tai-maknate chhawm nung zel turin kal khawmte a chah.

Inkhawm hi Manipur MZP president Paul Lalchhanhima'n a kaihruai a; IAS pahnih JC Ramthanga leh Lungmuana, MZP vice president B Vanlaltana leh Mizo Peoples Convention president Vanlalrinliana te pawhin thu an sawi a ni.