Consumer-te'n an chanvo hriat a ṭul : JERC

Joint Electricity Regulatory Commission (JERC) for Manipur and Mizoram hotute chuan, Mizo mipuiin kawlphetha hman leh a kaihhnawih hrang hranga mipuiin chanvo an neih te, an mawhphurhna leh lung-awi lohna thlen dan tur an hre tawk lo niin an sawi a, "Consumer-te hian kan dikna chanvo kan hriat a ṭul tawh hle a ni," an ti.

Vanglaini palaiin a kawmnaah JERC hotute chuan, Mizo mipui-te'n kawlphetha hman kaih-hnawihah an dikna chanvo an hriat zel a pawimawh thu an sawi rualin, consumer-te'n mawhphurna hrang hrang an neih ve avangin, chung-te chu an hriat chian a ngaih thu an sawi.

JERC hotute chuan Power & Electricity department mawhphurhna an sawi a, chungte chu - kawlphetha rintlak leh ṭha mipui hnena pek te, electric him tak pek te, a hun taka electric bill sem chhuah te, electric-a harsatna leh buaina a awm-in a rang thei ang bera buaipui leh siam ṭhat te, consumer-te hnenah electric ṭangkai taka hman thiam leh renchem dan zirtir te, electric bothlau (loss) tamna lai leh a awm chhan zir chianga siam ṭhat te, sum hman dan record felfai tak neih te, rang taka complaint chinfel te, kawlphetha awm loh tur thu hriattir hmasak te, Consumer Grievances Redressal Forum(CGRF) leh Internal Grievances Redressal Cells (IGRC)-a lungawi lohna thlen dan tur consumer-te hriattir leh, a khát tawka electric bungrua leh wiring enfiah ṭhinte a ni.

JERC-in Standard of Performance Regulations, Electricity Supply Code, Grid Code a siam-a regulations-ah P&E department tih tur leh tih loh turte leh dan leh kaihhruainate zawm a nih loha dan anga hrem chungchangte chu ngaih pawimawh a ngai niin an sawi.

Electricity Act, 2003 Section 181-in dan siam tura JERC thuneihna a pek angin, JERC hian Manipur leh Mizorama felfai taka power sector kalpui nan leh consumer-te chanvo venhimsak turin a ṭul dan angin dân an siam a, chungte chu consumer-te'n an hriat ve a ṭul thu an sawi.

JERC hotute chuan, power him leh ṭha neih, electric bill dik tak a hun taka dawn, connection pek dân, meter reading lak leh bill dân, connection hlihsak theih dan leh complain siam dânte zawh chiana hriat a
ṭul thu sawiin, "Connection hlihsak hmaa hlih
ṭul chhan leh hlih hun tur te, connection pek theih leh hun tur hriatirna dawn te, a rang thei ang bera dik taka an harsatna leh buaina chinfelsak te, consumer-te chung-chang puanzar loh chi zah leh humhalhte chu ngaih pawimawh zualte a ni," an ti.