KHAWTHLIR

Bill pahnih pawm

Nimin Assembly session-ah chief minister Lalduhoma put luh, 'The Mizoram Goods and Services Tax (First Amendment) Bill, 2025' leh LESDE minister Lalnghinglova Hmar put luh 'The Mizoram Private Placement Agencies (Regulation) Bill, 2025' chu sawiho a nih hnuah pawm a ni.

Kût hmang ṭan

Chapchar Kût hmang turin inbuatsaihna a kal mek a, Chapchar Kût pualin nimin aṭang khan Aizawlah thil chi hrang hrang buatsaih ṭan a ni. Nimin zing khan Chapchar Kût Tlân huaihawt a ni a, chhun lamah Vanapa Hall kawt leh Zodin Square inkar kawngpui kamah handloom exhibition buatsaih ṭan a ni. Vawiin hian Vanapa Hall-ah ni li chhung awh tur Art & Photo Exhibition ṭan a ni dawn a, Aijal Club Park-ah March 4-8, 2025 chhung awh tur Flower Show buatsaih ṭan a ni bawk ang.

Police lakna tur

Mizoram sorkarin police constable eng emaw zat a lak tur chungchanga nimina chhuak Vanglaini-a physical test tihna tur tarlana fiah tawk lo a awm a; physical test tihna turte chu - Northern Range 'A' tan Mualpuiah, Northern Range 'B' tan Lungverhah, Southern Range tan Lungleiah leh, Eastern Range tan Khawzawlah a ni.

Sangha rêp man

Hnahthial District Fisheries Development Officer pisaa thawkte leh Hnahthial Chanmari Branch YMA Luidung Humhalh Committee duty-te chuan nimin khan Tuichang luia dan loa man sangha (a rêp) kg. 13 leh a neitua puh mi pahnih an man. Sangha rêp an man hi tualchhunga hralhna ang chuan Rs 20,000 vel man a ni a; a neitute chu PC Lalpekhlua s/o PC Vanlalliana leh Lalremruata s/o Lalzarliana, Hnahthial Electric Veng ve ve an ni.

Vawk lak luh khap

Champhai bawrhsap Mohammad Aaquib chuan BNSS 2023 tlawhchhanin hriattirna thupek a chhuah a; Champhai district-ah ram dang aṭanga vawk, vawksa leh vawksa aṭanga siam lak luh phal a nih loh thu a puang. Vawk damlo talh leh zawrh khap a nih thu te, vawk thite thûk taka phûm tur a nih thute a tarlan bawk.