'Walk for Health Walkathon' buatsaih

Mizoram Health Systems Strengthening Project (MHSSP) hmalakna hnuaiah nimin khan Lungleiah hriselna atana kea kal rûnpui, 'Walk for Health Walkathon' buatsaih a ni.

Lungleia Walkathon-ah hian sorkar hnathawk tem khawtlang hruaitu te, tlawmngai pawl hrang hrang aiawh te, kohhran ṭhalai te, college leh sikul zirlaite telin, mi 2,000 vel an tel. Chhim lamah AOC petrol pump bul aṭangin an kal a, hmar lamah Kikawn aṭangin an kal ṭan thung a, Lunglei Venglaia tennis court hluiah an intâwk khawm a ni.

Walkathon khârna buatsaih niin, Lunglei chief medical officer Dr LC Liana'n a kaihruai a; Lunglei additional DC James Miahlung-in thu sawiin, natna inkai chhâwn theih loh hrang hrang laka fihlim turin ei leh in uluk bakah, taksa sawizawi ṭhat a pawimawh thu a sawi a, kea kal uar turin mipui a chah.

Zobawk damdawi-in (PHC)-a medical officer Dr Noel Lalremruata Sailo-in non-communicable disease chungchang leh inven theih dante a sawi a; kea kal ngai pawimawha nunpui tura intiamna thu sawi rual a ni bawk.

MHSSP hnuaiah 'Hriselna atan kea kal' (walk for health) tih thupui hmangin Mizorama district pangaah district level-ah leh khaw 510-ah village level-ah walkathon buatsaih tura ruahman a ni. 'Walk for Health' hi district hrang hrangah buatsaih chhoh mek a ni a, Lunglei district-ah chuan March 1- 4, 2025 chhungin khaw 114-ah buatsaih tum a ni.