Police-in fimkhur turin mipui an chah

Mizoram Police chuan thuchhuah siamin, tunlaiin Lengpui Airport aṭanga zin chhuak tur zingah phalna nei loa silaimu keng Airport-a man an awm fo tih an tarlang a; phai lama zin turte fimkhur turin an chah.

Mizoram Police chuan, fimkhur loh vanga silaimu emaw ak palhte pawh license nei lo an nih chuan dan (Arms Act) hnuaiah thubuai ziah luh a ṭul thu an tarlang a, "Thubuai kan neih theihna laka kan him theih nan silai leh a mu (arms & ammunition) kawl reng rengin danin a phût angin license kan nei ngei tur a ni," an ti.

Lengpui Airport aṭanga zin chhuak turte chu an in an chhuahsan hmain an ip, thawmhnaw leh thil dang an ken turte uluk taka endik hmasa turin Police-te chuan an chah a; mi dang ip leh thil dang an kensak turte pawh airport thlen hmain uluk takin a chhunga awmte endik hmasa ṭhin turin an chah bawk.