Kumin chhungin Mizoramah RTI Online-in zawhna 1,107 a lut tawh

Mizoram Information Commission (MIC) chuan nimin khan Lawngtlai DC conference hall-ah RTI Act chungchang inzirtirna an buatsaih a, kumin chhungin Mizoram RTI Online kaltlangin zawhna 1,107 a luh tawh thu tarlan a ni.

Zirhonaah hian Lawngtlai district-a state public information officer (SPIO) leh state assistant public information officer (SAPIO)-te an tel a; Right to Information (RTI) Act chungchang pawimawhte inzirtir a nih bakah, zawhna leh chhanna hun hman a ni.

Zirhona hmanpuitu chief information commissioner John Neihlaia chuan, RTI Act chu October 12, 2005-ah India ramah hman ṭan a nih thu leh Mizoramah pawh June 2006-ah MIC din a nih thu a sawi a, "India ramah RTI Act hi langtlang sorkar siamna tura duan a nih angin, Mizoram mipui pawhin an hmang ṭangkai hle a ni," a ti a; kumin chhungin Mizoram RTI Online kaltlangin zawhna 1,107 a luh tawh thu a sawi.

John Neihlaia chuan, "Hlawhtling taka RTI Act kalpui turin SPIO leh SAPIO-te'n mawhphurhna sang tak in nei a, langtlang sorkar siam turin theihtawp chhuah fo ang che u," a ti a; zawhna an dawnte a hun taka chháng zel tur leh hrem ngaia awm lo turin a chah.

Zirhonaah hian information Commission secretary H Dolianbuaia'n RTI Act, 2005 chungchanga hriat tur pawimawhte a sawifiah a ni.