District 7-te ODF Plus (Model) an ni tawh

State Water and Sanitation Mission (SWSM) Apex Committee chu nimin khan chairman Khilli Ram Meena, chief secretary hovin CS Conference Hall-ah an ṭhu a; December ni 31, 2024 thleng khan Mizoram district 11 zinga district pasarih chu ODF Plus (Model) a ni tih tih tarlan a ni.

Ṭhutkhawmah hian PHE department hotute bakah, member department dang - LAD, Finance, IPR, School Education, Health & Family Welfare, Planning & Programme Implementation leh Rural Development department aṭangin secretary-te leh an aiawhte an tel.

Swachh Bharat Mission (Grameen) Phase-II hnuaia kum 2025-26 chhung atana hmalakna tur Annual Implementation Plan chungchang sawiho a ni a; Annual Implementation Plan-ah hian cheng nuai 2,549 chuang ruahman a ni.

Meeting-a tarlan danin, December 31, 2024 thleng khan Mizorama district 11 zinga district pasarih chu Open Defecation Free (ODF) Plus (Model) an ni tawh. March 2025 thla tawpah chuan district pakhat dang ODF Plus (Model) a nih theih beisei a ni a; district dang pathum chu 2025-26 plan chhungah ODF Plus (Model) an nih theih beisei a ni bawk.

Mizorama khaw 569 chu ODF Plus (Model) an ni tawh a, kumin March thla chhungin ODF Plus (Model)-ah khua 51 puan leh theih beisei niin, Annual Implementation Plan 2025-26 chhungah khaw 17 dang puan leh theih tum a ni.

Annual Implementation Plan 2025-26 chhunga hmalakna tur duan zingah - vantlang êk-in atana soak pit siam te, tuihâwk sâwngbàwl te, bawlhhlawh khawn khawm, paih leh sâwngbâwlna leh thil dang chi hrang hrangte a tel a ni.