World Hearing Day vawi 18-na hman a ni

Nimin kha World Hearing Day vawi 18-na a ni a, Directorate of Hospital & Medical Education auditorium-ah hman niin, HME director Dr Eric Zomawia'n a hmanpui. Sorkar kum kal mekah April 2024 - January 2025 chhungin Mizorama beng enfiah mi 39,688 zinga 14,022-in beng lamah harsatna an nei tih hmuh chhuah a ni.

World Hearing Day hi Geneva Headquarters-in a rel angin khawvel pumah kum 2007 aṭang khan kum tin hman ṭhin a ni a; Day-in a tum ber chu, bengngawngte harsatna hriatthiampui tur leh bengngawnna titlem tura mipui hnena zau zawka zirtirna thehdarh a ni. Kumin thupui chu 'Changing mindsets - Empower yourself to make ear & hearing care a reality for all' tih a ni.

National Health Mission (NHM), Mizoram hnuaiah August 2014 aṭang khan National Programme for Prevention and Control of Deafness (NPPCD) din a ni a; NPPCD hnuaiah hian beng lama harsatna neite hmu chhuak turin hma lak a ni ṭhin.

Sorkar kum kal mekah April 2024 aṭanga January 2025 thleng khan Mizoramah mi 39,688-te beng dinhmun enfiah a ni a; chu'ng zinga mi 14,022 chuan bengah harsatna an nei tih hmuh chhuah a ni. Ri hriatna ṭha lo mi 3,495 an awm a; bengdár vuah tura tih (refer) mi 3,174, beng zai 269 leh investigation tihsak mi 6,416 an awm.

Mi 255 hnenah bengdár pek a ni a, bengdár dawng turin mi 3,319 refer an ni. Bengdár sem chungchangah hian Rashtriya Bal Swasthya Karyakram (RBSK), Ephatha Society, Ephatha Special School leh Redeem Garden-te thawhpui an ni a; National Institute for Locomotor Disorder - North Eastern Regional Council (NILD-NERC), ALIMCO leh AYJNISHD (D), Bhubaneshwar-te nen thawhho a ni bawk.