AP Anti Conversion Bill ṭhiat turin CCM-in Arunachal CM an ngen

Council of Churches in Mizoram (CCM) chuan Arunachal Pradesh-a Anti Conversion Bill tia hriat 'Arunachal Pradesh Freedom of Religion Act' chu ṭhiat turin Arunachal Pradesh Chief Minister an ngen.

CCM general secretary Rev. Dr Lalhmangaiha chuan nimin khan Arunachal Pradesh chief minister Pema Khandu hnenah lehkha a thawn a, "Arunachal Pradesh-ah Kristiante ralmuang taka an awm theih nan Anti Conversion Bill, 1978 hi ṭhiat turin kan ngen che a ni," a ti.

CCM chuan, Indian Constitition-a Article 25 angin India khua leh tui zawng zawngte'n eng sakhua pawh an zawm thei a, sakhaw rinna thehdarh turin zalenna an neih thu an tarlang. Anti conversion law chuan khua leh tuite dikna chanvo (constitutional right) a bawhchhiat thu te, dan chu mi tam takin an hman sual theih thu leh state chhunga hnam tlem zawkte chunga hleilenna leh tihduhdahnate a thlen theih thute an tarlang bawk.