IT Act hnuaiah thubuai 53 ziak lut tawh

Mizoram police CID (Crime) chuan, kum 2009 aṭanga kumin June thla thleng khan Information and Technology (IT) Act hnuaiah thubuai 53 an ziak lut. CID (Crime) hotute chuan, IT kaihhnawihah police-a FIR thehluhah thlalak nen kimchang taka ti ṭhin turin mipui an chah.

Vanglaini palai zawhna chhanga CID (Crime) hotute sawi danin, tun hnai kum ruk chhunga IT Act hnuaia thubuai ziah luh tam ber kum chu 2014 niin, thubuai 24 ziah luh a ni. Kum danga thubuai ziah luhte chu 10 a tling lo vek. Kumin bikah chuan July thla tawp thleng khan thubuai paruk ziah luh a ni.
CID (Crime) hotute chuan, IT Act hnuaiah thubuai ziah luh bakah hian, Indian Penal Code (IPC) hnuaia ziah luh IT kaihhnawih thubuai a awm nual tih an sawi a; thubuai ziah luh zinga 80% vel chu Facebook kaihhnawih thubuai a nih thu an sawi.
Police-in IT kaihhnawiha thubuai an ziah luh zinga a tam zawk chu Court-ah chargesheet an thehlut tawh a, mahse Court lamin thutlukna siam leh thuremna tihchhuah a la nei loa thu dawn a ni.
CID hotute chuan, IT kaihhnawiha thubuai thehlut turte chu thlalak - screenshot/print screen nen thehlut turin an chah a, "A theih phei chuan computer aṭanga print screen ni se, website link-te a lang thei dawn a ni. A kimchang thei ang bera thehluh a ṭha a, thil thlen hun lai chiang taka tihlan bawk tur a ni," an ti a; tunlaia mi tam takin an chìn 'copy-paste' tih chu himna a ni lo tih an sawi.
CID (Crime) SP Lallianmawia chuan, tunlaiin bank account hralh leh lei a hluar hle tih sawiin, mi tin fimkhur turin a chah a; "SIM Card pawh mahni hminga register ngei hman a ṭha. Debit card tihchingpen (hack) pawh a awm zauh zauh tawh avangin fimkhur a ngaih ṭan a ni," a ti.