KHAWTHLIR

Dr. Abdul Kalam Ni 7 sûn dawn
President hlui Dr APJ Abdul Kalam chu sorkar laipui lam thu angin Mizoram sorkar pawhin ni sarih a sún dawn. Political & Cabinet department-in hriattirna a chhuah danin, Abdul Kalam sùn nan July 27 aṭanga August 2 thleng sorkar pisa hrang hrangah hnam puanzar a ngul chanve-ah zàr a ni ang a, hemi hun chhung hian sorkar hminga intihhlimna lam chi reng reng buatsaih loh tur a ni.

NHM training
National Health Mission bultumin nimin khan Health directorate conference hall-ah Enhancing Performance of Health Worker trainer-te tan training buatsaih a ni a, Health principal director Dr K Ropari leh NHM mission director Dr K Lalbiakzuala ten an hmanpui. He hunah hian district tina chief medical officer-te an tel a ni.

Heroin man
Mizoram police-te chuan July 27, 2015 tlai dar 4 vel khan Ralkapengi (35) w/o Vanlalawia (L) in, Turial Airfield aṭangin heroin gram 16½ an man a, ND&PS Act hmanga thubuai an siamsak. Heroin an man hi tualchhunga an hralhna ang chuan Rs. 90,000 vel hû a ni.

Hlawh tur rawt
Minimum Wages Sub-Committee member-te July 27, 2015-a LE&IT director pisaa ṭhukhawm chuan, muster roll leh casual employee-te hlawh turah rawtna an siam. An rawtna chu - ni khatah unskilled tan Rs. 270, semi-skilled tan Rs. 300, skilled-II tan Rs. 370 leh skilled-I tan Rs. 460 a ni.

President hlui sûn
Mizoram Univesity chuan nimin khan an conference hall-ah President hlui Dr APJ Abdul Kalam sûnna hun an hmang. He hun hi registrar C Zothankhuma'n kaihruaiin, Dr APJ Abdul Kalam chanchin a sawi a, vice chancellor Prof. R Lalthantluanga'n sûnna thu a sawi. Hetih lai hian, Congress leh MPC party-te chuan thuchhuah siamin, Dr APJ Abdul kalam chu an ui thu tak zet thu an tarlang.