MGNREGA-a thawkte hlawh tihniam Sum dawn tlem vangin kan tihniam: RD dept.

Mahatma Gandhi Natio­nal Rural Employment Gurantee Act (MGNREGA) hnuaia thawkte chu tun hnai khan an hlawh tihhniamsak an ni. Rural Development (RD) department hotute chuan, hlawh tihhniam chhan chu sorkar laipui aṭanga pawisa an dawn tlem vang a nih thu an sawi.

Thu dawn danin, MGNREGA hnuaiah hian mi 750 vel an thawk mek a, group A, B, C leh D-ahte ṭhen an ni. Group A-a mite hlawh chu Rs. 25,200 aṭangin Rs. 21,000-ah tihhniam a ni a; group B-a mite chu Rs. 21,700 aṭangin Rs. 14,920-ah, group C-a mite chu Rs. 11,900 aṭangin Rs. 9,910-ah leh group D-a mite chu Rs. 8,140 aṭangin Rs. 6,780-ah tihhniam a ni.

Vanglaini palai zawhna chhangin RD department hotute chuan, "MGNREGA atana sorkar laipui aṭanga kan pawisa hmuh a tlem tak zel avangin thawktute hlawh hi tihtlem loh theih a ni lo," an ti a; sorkar laipui aṭanga sum dawn a pung leh a nih chuan hlawh chu ennawn leh theih reng a nih thu an sawi.

RD department hotute sawi danin, MGNREGA hnuaia thawkte hlawh tihhniam tur chungchang hi a changtu minister chairman-na hnuaiah uluk taka ngaihtuah a nih hnua tihhniam a ni.

MGNEGA hnuaia thawk­te hlawh atan hian sum hmuh zawng zawng aṭanga 6% hman phal a ni. Sum dawn a tlem zel avangin sum hmuh aṭanga 6% chu a tlem telh telh a, chu vang chuan thawktute hlawh chu tihhniam a nih loh chuan kal ngaihna a awm lo niin an sawi. Tunah hian state hrang hrang chuan hlawh atana hman theih zat percentage tisang turin sorkar laipuiah dilna an thlen mek a ni.

RD department hotute chuan, MGNREGA hnuaia thawkte chu an dinhmun tur an hriatthiampui viau nã a, an hlawh tihniam lo thei lo an niin an sawi a, "Tuna an hlawh kan tihhniam hnu pawhin pawisa kan dawn zat chuan a pha chuang lo. Mahse, an dinhmun kan ngaihtuah avangin a tlem thei anga tihhniamsak an ni," an ti.