MHIP-in nu HIV+ve 308 hmu chhuak

MHIP general headquarters chuan, nimin khan an pisaah Infrastructure Leasing & Financial Services Ltd. (ILFS) kaltlanga project an khawih thlirlêtna hun an hmang. Kum 2011-a project an khawih aṭanga March 2015 thlengin nu HIV hrik pâi 308 an hmu chhuak tih tarlan a ni.

ILFS hnuaia project hi January 2011-ah la ṭanin, project-in a tum ber chu nu aṭanga nautein HIV hrik an kài lohna tura vên hna thawh a ni a; Aizawl district leh Serchhip district-ah project hi kalpui a ni. District coordinator leh accountant pakhat ve ve leh outreach worker 14-te'n an enkawl mek.

Project hmang hian nu nau pâi 10,111-te thisen endik tawh niin, chung zinga 308 chu HIV hrik pai an ni tih hmuhchhuah a ni. Nu nau paite chu HIV an kai leh kai loh enfiah turin thisen enfiahna hmunah an hrilh ṭhin a, HIV hrik paite chu ART Centre-ah an hruai leh ṭhin.