Tripura transit camp-a Bru zingah Mizorama kir duh an awm lo
Tripura transit camp-a Mizoram Bru awmte lak lêt tumna kal zelah, nimin khan Naisingpara camp-ah Mizorama kir duhte enfiah hna thawh ṭan a ni a, mahse Mizorama kir duha inenfiahtir an awm lo.
Thu dawn danin, Naisingpara-a Bru-te enfiah tur hian Mizoram aṭangin Mamit SDC pahnih - Lalbiakfela leh Gaston Vanlalhriatpuia, Kolasib SDC Lalhmingliana leh Lunglei SDC pahnih - Daniel Sailo leh Vanlalchhuanliana te an kal a; thawktu dang eng emaw zatin an ṭawiawm.
Mizoram official-te bakah hian Tripura-a Gachirampara Police Outpost-a police te, SIB mite leh Assam Rifles mite chu transit camp-ah hian an kal a ni.
Mizoram sorkar official-te hian chawhma dar 10:30 aṭanga tlai thleng Naisingpara-a Mizoram Bru Displaced People Forum (MBDPF) pisaah Mizorama kir duhte an nghak a, tlai dar 4 thlengin inlan an awm lo a ni.
Sorkar chhinchhiah danin, Naisingpara hi Bru camp zinga a lian ber niin, chhungkaw 2,700 vel an awm a, chung zinga chhungkaw 2,469 chu Mizoram mi nia ngaih an ni. He camp-a enfiah hna hi August 5, 2015 thleng thawh a ni ang a, Mizorama lêt duhte chu August 10-21 inkarah hruai kîr an ni ang.