IPR director-in press mite kâwm

Information & Public Relation (IPR) director Jim K Chozah chuan, nimin khan Saihaa IPR office-ah thuthar thehdarhtute a kâwm a, thawhhopuiah a sáwm. Inkawmnaah hian media hmasawn zel dan tur an sawiho.

Jim K Chozah chuan, IPR department leh Mizorama thuthar theh­darhtute'n thawhhona ṭha an nei tih sawiin, "Inthlung nghet tak kan nih avang hian kan inkarah boruak ṭha lo awm thei lakah pawh rilru zau tak leh hriat­thiamna kan put tawn zel a ṭul.

Media mawhphurhna a pawimawh rual­in, kan zahawmnate lo lanna chu kan mawhphurhna hlen hian a ni," a ti.

Ni tin chanchinbu chhuah leh enkawlna kawngah nasa zawka ṭan lak a ṭul tih sawiin IPR Director chuan, "Media-te hmasawnna leh hamṭhatna hi sorkarin a ngai pawimawh a ni," a ti a; tih tak zeta hna thawk ṭhinte chauhin hlawhtlinna an chang ṭhin tih hre reng turin a chah.