Hmeichhe naupang bumtu man

January 9, 2015-a Chawngte khaw bul aṭanga hmeichhe naupang kum 14 mi bum a, phaia hruai thlatu Parul Islam Laskar (23), Cachar district, Assam chu tun hnai khan Bangalore-ah man a ni a, nimin khan Lawng­tlai thlenpui a ni.

Thu dawn danin, Parul Islam Laskar hian hmei­chhe naupang hi Silchar-a kal­puiah sáwmin, nupuiah neih luih a tum a, chumi hnuah Bangalore-ah kalpui­in, a khung bo ta a ni.

He thil thleng hi Lawngtlai police-te chuan chhui zuiin, tun hnai khan Bangalore police nen ṭangkawpin Parul Islam Laskar chu man a ni a, hmeichhe naupang pawh chhanchhuah nghal a ni. An pahnih hi nimin khan Lawngtlai an thlenpui.

Parul Islam Laskar an phurhna night bus chu nimin zing khan Zobawk Vengtharah a ke a chhiat avangin hun eng emaw chen a ding a, Parul Islam chu tlanbo a tum a, mahse police-te'n YMA pun nghalin, man leh a ni.