Natna khirhkhan enkawlna siam

National Programme for Prevention and Control of Cancer, Diabetes, Cardiovascular Diseases and Stroke (NPCDCS) leh National Programme for Prevention and Control of Deafness (NPPCD)-te chuan nimin khan Vaivakawn Presbyterian Kohhran Centenary Hall-ah awareness campaign leh special clinic an buatsaih.

Khuallian, Hospital & Medical Education director Dr K Lalbiakkima chuan, NPCDCS leh NPPCD-in a huam natnate chu Mizorama hriat lâr tawhte an nih thu sawiin, uluk taka inenkawl chuan ven leh tihdam theih a nih thu a sawi a; ‘Tih dan aiin inven a ṭha zawk’ tih hre reng turin kal khawmte a chah.

Awareness campaign-ah hian Non-Communicable Disease (NCD) state nodal officer Dr Eric Zomawia'n NCD hrang hrang leh a awmziate a sawifiah a; cancer, zunthlum, lung ṭha lo, stroke awm chhan leh vei lo tura invên dante a sawi. Aizawl Civil Hospital-a ENT specialist Dr Lalhmachhuana'n beng enkawl dante a sawi bawk.

Special clinic-ah mi 300 chuang an inentir a, mi panga chu FNAC tihsak an ni.