Mizoram puma ICU-ah khum 82 a awm Sorkar damdawi-in ICU-ah khum 28
Mizoram chhunga damdawi-in hrang hrangah intensive care unit (ICU) nei damdawi-in 14 a awm a, chu'ng damdawi-in ICU-a khum awm zat chu chu 82 a ni. ICU-a khum 82 zinga 28 chu sorkar damdawi-ina mi a ni a, khum 54 chu mimal leh kohhran damdawi-ina mi a ni thung.
Vanglaini palaiin damdawi-in hrang hrang aṭanga thu a dawn danin, sorkar damdawi-in zingah Aizawl, Champhai, Kolasib, Siaha leh State Refferal Hospital/ZMC-te chiahin ICU an nei.
Champhai District Hospital ICU-ah khum panga a awm a, chu'ng zinga khum pahnihah chuan ventilator hman tur dah a ni lo. Siaha District Hospital ICU-ah khum pahnih a awm a, enkawltu tur an awm lo thung.
Covid-19 veite enkawlna tur bika serh hran (dedicated covid hospital) SRH/ZMC ICU-ah chuan khum 14 a awm a; chu'ngte bakah, ventilator hman theihna tur (make shift ICU) khum 22 ruahman a ni.
Lunglei Civil Hospital bakah Lawngtlai, Serchhip, Mamit, Saitual, Hnahthial leh Khawzawla district hospital-ahte chuan ICU an nei lo.
Lunglei Civil Hospital-ah chuan ICU aia changtlung lo zawk high dependency unit khum pali awmna a awm thung. Sorkar damdawi-in hrang hranga thawktute chuan, ICU tur ruahman mek a nih thu an sawi hlawm.
Sorkar thuchhuah tarlan danin, Covid-19 hripui lèn hmain Mizoram sorkar damdawi-in hrang hrangah ventilator 70 dah a ni a, chu'ng zinga eng emaw zat chu district hrang hranga trauma centre-a dah tur a ni. Trauma centre-te chu sak zawh a la ni lo hlawm nãin, ventilator-te chu mamawhna avangin hman ṭangkai mek a ni.
Covid-19 a lèn hnuah ventilator chu nunna chhanna atan a pawimawhzia hriain India sorkar laipuiin state hrang hrangte a thlàwnin a sem a, Mizoram sorkar pawhin ventilator 119 a dawng. Hmun dang aṭanga dawn nen Mizoramah ventilator 199 a awm meka sawi a ni.
Aizawl khawpui leh a chhehvela mimal leh kohhran damdawi-in zingah Synod Hospital, City Hospital, LRM Hospital, Greenwood, Aizawl Hospital, Grace Nursing Home, Trinity Hospital leh Ebenezer Medical Center-te'n ICU an nei a; khum awm tamna ber Trinity Hospital-ah khum 10 a awm.
Vanglaini palaiin a biak pawh chinah Aizawl khaw páwn lama mimal leh kohhran damdawi-in zingah Christian Hospital, Serkawn chiahin ICU an nei. Anni hian ICU-ah khum pali an nei a, pahnih chu damdawi-in chhungah niin, pahnih chu damdawi-in páwn deuhah Covid-19 vanga an siam thar a ni.