Covid-19: Mizoram dinhmun Hripui vei 80 hmuh belh a ni

October 27, Thawhlehni khan Mizoramah Covid-19 vei mi 80 hmuh chhuah an ni a, a tam ber chu Mizoram chhunga kái chhâwng an nih laiin, Mizo sipai (Indian army) chawlh hmanga rawn haw thar mi 11 an tel. Nimin khan hripui laka fihlîm tawh mi panga chhuahtir an ni thung.

Covid-19 positive Thawhlehnia hmuh chhuah tharte chu mipa 46 leh hmeichhia 34 an ni a; ZMC laboratory-a hmuh mi 71, TrueNAT-PCR hmanga district pahniha hmuh mi pahnih leh, Rapid Antigen Test (RAT) hmanga district pahniha hmuh mi pasarih an ni. RAT hmanga hmuh zingah hian sorkarin tun hnaia RAT tih phalna a pek Synod Hospital leh Ebenezer Medical Center-a hmuh chhuah mi pakhat ve ve an tel.

Nimin khan Covid-19 vei enkawlna hmun aṭangin fihlîm tawh mi panga an chhuak a; SRH-ZMC aṭangin mi pathum leh Zobawk CCC aṭangin mi pahnih an chhuak. Thawhlehni khan mi 21 an chhuakbawk.

Mizoramah Covid-19 vei mi 2,607 hmuh chhuah tawh a ni a, mipa 2,044 leh hmeichhia 563 an ni. An zinga mi 2,238 (85.85%) chu chhuahtir an ni tawh a, mi pakhatin a thihpui tawh a, enkawl mek mi 368 (14.15%) an awm a ni.

October 27-ah hian Mizoram hmun hrang hrangah mi 1,508-te swab sample endik a ni a; ZMC laboratory-ah RT-PCR hmangin sample 730, district pakuaah TrueNAT-PCR hmangin sample 72 leh RAT hmangin district tin (11)-ah sample 706 endik a ni.

ZMC laboratory-ah Covid-19 vei mi 71 hmuh an ni a, mipa 38 leh hmeichhia 33 an ni. Aizawl district-a swab sample lak vek an ni a, Aizawla veng 27-a mite bakah, Farkawn leh Sangau khuaa mite an ni.

Falkland Venga Covid-19 positive hmuh thar pakhat, hmeichhia kum 19 mi chu a hma pawha hripui lo vei tawh, covid care centre-a enkawl ṭhin, a negative hnua chhuahtir tawh a ni a; hun eng emaw ti hnuah Covid-19 a vei leh ta a ni.

ZMC-a hmuh chhuah zingah sipai chawlh hmanga rawn haw mi 11 an tel a, an vaiin quarantine facility-a awm lai vek niin, symptom an nei lo. India army-a Mizo awmte hi Assam Regiment an ni tlangpui a, hmun dangah pawh kual an ni ṭhin a, chu'ng zingah chuan Rashtriya Rifles (J&K-ah an awm tlangpui) an tam ber thu pawh Sainik Welfare & Resettlement department hotute chuan an sawi.

Chaltlang Lily Venga cheng hmeichhia kum 22 leh Lawngtlai khaw mi mipa kum 22, Delhi aṭanga haw ve ve, symptom nei lote hmuh chhuah a ni bawk. Mizoram chhunga kái chhâwngte chu a hranpain tarlan a ni.

Lawngtlai District Hospital-ah Kamalanagar-II khuaa mipa kum 59 mi, police (2nd battalion MAP) hmuh a ni a, tun hnaia Guwahati aṭanga haw, khung hran lai, symptom nei lo a ni.

Khawzawl District Hospital-ah pawh Khawzawl Zuchhip Venga mipa kum 30 mi hmuh chhuah a ni a; amah hi sipai, chawlh hmanga Jammu & Kashmir aṭanga haw, quarantine facility-a awm la niin, symptom a nei lo.

Rapid Antigen Test hmangin Aizawlah Covid-19 positive panga hmuh chhuah a ni a; Dinthar vengah mipa pahnih, Kanan Veng, Durtlang leh Chawlhhmunah mipa pakhat ṭheuh hmuh a ni.

Saitualah hmeichhia kum 17, Ngopa khuaa mi hmuh chhuah a ni a; Lawngtlaiah Sangau khuaa mipa kum 17 mi hmuh chhuah a ni bawk.