Hmeichhia pawngsual leh thaha vautu Sakawrdai doctor man a ni

Dar­lawna NGO pakhat, JERACOM,  chuan thuchhuah siamin, an thawhpui nula pakhat chu Sakawrdaia medical officer Dr JH Vanlalnun-mawia s/o JH Vanlal-nela, Ramhlun North-in October 26, 2020 (Thawhṭanni) khan pawngsual a tum niin an tarlang. Hemi chungchangah hian MHIP Gen.Hqrs leh Sakawrdaia páwl hrang hrangte chuan an dem thu an puang a; amah hi Sakawrdai police-in an man.

JERACOM DIC thuchhuahin a tarlan danin, Sakawrdaia peer educator hna chelh lai chu October 26 khan an meeting zo chu Sakawrdai lam panin a ṭhiannu nen Dr JH Vanlalnunmawia, Sakawrdai CHC car-ah an chuang haw a, a ṭhiannu chu Ratu-ah a chhuk.

A ṭhiannu chhuk hnuah doctor hian páwngsual tumin a rîkrâp  a, a khawih mai theih tâk lohah chuan thahah a vau a, zu in luihtirte a tum. Car-a tlân liampuiah a vau a, kawng sir leh tuihâwk luankawrte a dâi lui chung pawhin nula chu a ṭan tlat tho avangin tlan liampui tak tak a tum a; kawng sira Airtel ban ding an sut hnuah a tlân chhunzawm thei ta lo a ni. Hmeichhe au ri an hriate'n an ngaihven a, an chhan ta a ni.

JERACOM, Darlawn chuan, an thawhpui chunga thil thleng chu rapthlak an tih thu leh an lungawi loh tak zet thu an tarlang a, "Doctor hi sorkarin a phû tâwk hremna pe ngei se kan duh," an ti.

MHIP Gen.Hqrs chuan thuchhuah siamin, Dr JH Vanlalnunmawia'n Sakawrdai nula pawngsual a tum leh thaha a vau chu thinrimthlak an tih thu an tarlan rualin, police-in pawi khawihtu doctor rang taka an man chu lawmawm an tih thu an tarlang.

MHIP chuan, hmeichhe chunga mawi lo taka chetna ang chu thleng tawh lo se an duh thu an tarlang a, "Sakawrdai nulain huaisen taka a zahawmna humhim tura a che hi a ropuiin kan fak tak zet a ni," an ti.

Sakawrdai Joint YMA, Joint MHIP, MUP leh Hmar Students Association-te pawhin thuchhuah inṭâwm siamin, "Dr JH Lalnunmawia'n Sakawrdai nula mawi lo taka khuaikhem a tum leh a nunna lâk hial tuma thlabár taka a siam hi rilru natthlak kan ti a, kan dem tak zet a ni," an ti a; pawi khawihtu chu a na thei ang bera hrem an phût thu leh Sakawrdai damdawi-inah doctor dang dah thuai tura sorkar an beisei thu an tarlang.